Kushone 3 kwalimala 10 engozini yetekisi

KUSHONE abantu abathathu kwalimala abangu-10 engozini yetekisi ngasoThongathi emgwaqweni uN2 izolo.

Kuvela ukuthi le ngozi yenzeke ngemuva kokuthi iToyota Quantum ebithwele abagibeli iningi labo abebeya emsebenzini iphaphalazile yaphuma emgwaqweni.

Okhulumela abezimo eziphuthumayo KwaZulu-Natal, uMnuz Robert McKenzie, uthe bazamile ukuhlenga impilo yabagibeli kodwa ngeshwa abathathu bashona.

“Sifike endaweni yesigameko itekisi ilimele, kukhona abagibeli phakathi. Abathathu bese beshonile, salapha abantu abangu-10 endaweni yesehlo sabe sesibaphuthumisa ezibhedlela ezahlukene,” kusho uMcKenzie.

Okhulumela amaphoyisa KwaZulu-Natal, uLt Col Thulani Zwane, uthe kuvulwe icala lokubulala ngokungenhloso.

“Amaphoyisa asoThongathi aphenya icala lokubulala ngokungenhloso. Ngokophenyo olusenziwe iToyota Quantum ibithwele abagibeli abangu-13 ngesikhathi kwenzeka ingozi. Lesi sigameko senzeke namhlanje (izolo) ngo-4 ekuseni. Abagibeli abathathu bashonele endaweni yesigameko, abanye bathola ukulashwa. Kusaphenywa imbangela yayo,” kusho uZwane.

Kwenzeka le ngozi nje eThekwini kushone abantu abayisithupha ngoMgqibelo ezingozini ezehlukene.

NgeSonto kuM13 ngaseMgungundlovu, ngaphambi kokuba ufike eHillcrest, kushone owesifazane engozini yemoto.

Kuwo uN2 ngaseMandeni kushone owesifazane oneminyaka engu-34 ngesikhathi imoto abephambana nayo iphaphalaza yashayisa eyakhe.

Kulimale abathathu kule ngozi. Le ngozi yaseMandeni yenzeke ngoMgqibelo.