‘Abantu abehlise umoya kusalindwe isinqumo ngomzila’
“AKUSILO iqiniso ukuthi asikaze singenelele enkingeni yombango womzila ephakathi kukasoseshini waKwaSanti/Klaarwater nowaseChatsworth.”
Usho kanje uNgqongqoshe wezokuThutha, ukuPhepha nokuXhumana koMphakathi KwaZulu-Natal, uMnuz Mxolisi Kaunda emuva kokuphuma kodaba lokuthi akangeneleli embangweni womzila ophoqa abantu ukuthi balibashe ngonyawo uma beya esibhedlela i-RK Khan.
UKaunda ucele umphakathi nososeshini abathintekayo ukuthi behlise umoya futhi babekezele ngoba kusalindwe isinqumo senkantolo ngodaba lokuvinjwa kukasoseshini waKwaSanti/ Klaarwater ukuthi ushiye abantu esibhedlela iRK Khan esenkabeni yeChatsworth.
“Amarekhodi ethu aveza ukuthi usoseshini iSt Wendolins/Klaarwater wafaka isicelo sokuthutha abantu usuka KwaSanti naseKlaarwater uye nabo esibhedlela iRK Khan. Lesi sicelo saphasiswa ngo-2017 wanikwa imvume yokusebenza kulo mzila,” kusho uKaunda.
Uthe emuva kwalokhu usoseshini iChatsworth Minibus wafaka isicelo sokuphikisa le mvume eyayinikwe usoseshini waKwaSanti/Klaarwater kodwa isicelo sawo savuna abaKwaSanti/Klaarwater ukuthi baqhubeke nokusebenza.
Uveze ukuthi usoseshini iChatsworth Minibus uphinde wafaka isikhalo kwiTransport Appeals Tribunal ephethwe wuMnyango wezokuThutha kuzwelonke ufuna sibuyekezwe isinqumo esivuna usoseshini waKwaSanti/Klaarwater. UMnyango wezokuThutha ngaphansi kwePublic Regulatory Entity (PRE) wacela ukuthi ngesikhathi kusalindwe isinqumo awube uqhubeka nokusebenza usoseshini waKwaSanti/Klaarwater kodwa usoseshini waseChatsworth wazwakalisa ukungenami ngalokhu.
“Izikhulu zikasoseshini waseChatsworth zibe seziya enkantolo zafaka isicelo esiphuthumayo sokuvimbela usoseshini waKwaSanti/Klaarwater ukuthi uyise abantu eRK Khan. Lokhu kusho ukuthi usoseshini waKwaSanti/Klaarwater ngeke uye eRK Khan kuze kuphume isinqumo seTransport Appeals Tribunal,” kusho uKaunda.
Uzwakalise ukukhathazeka ngabagibeli abalibasha ngonyawo wathi uyathemba isixazululo sizotholakala maduzane.
“Sizizwile izikhalo zabagibeli nezososeshini abathintekayo, siwuMnyango sigculisekile ngesicelo esafakwa wusoseshini waKwaSanti/Klaarwater yingakho sawunika imvume yokusebenza kulo mzila silandela umthetho ofanele. Ngakolunye uhlangothi siyalihlonipha ilungelo lokuthi umuntu ofuna kubuyekezwe isinqumo sethu enze njalo. Siyawuhlonipha nomyalelo wenkantolo wokuthi kume ukuthuthwa kwabaya eRK Khan kuze kuphume isinqumo seTransport Appeals Tribunal. Siyathemba ukuthi isinqumo sizophuma maduzane futhi abantu ngeke bashiywe kude nalapho beya khona,” kusho uKaunda.
Okwamanje uKaunda uyalele amaphoyisa nazo zonke izinhlaka zomthetho ukuthi ziqaphe isimo ziqinisekise ukuthi zonke izinhlaka zilandela umthetho wenkantolo kuze kuphothulwe lolu daba.
“Sizoqhubeka nemizamo yethu yokuletha uzinzo embonini yezokuthutha KwaZulu-Natal nokuqinisekisa ukuthi abagibeli baphephile, bahamba ngezokuthutha ezisesimeni esifanele futhi ezingambi eqolo,” kusho uKaunda.