Sibashayela ihlombe othisha abafundisa sebethathe udekle
ISINQUMO sothisha asebesempeshenini sokulekelela ukuthuthukisa imfundo ezikoleni siyancomeka. Labo thisha baseMpumalanga, eThekwini, asebesengule inhlangano iSiyaphambili Retired Teachers Association, bathi bazimisele ukusiza lapho kushoda khona ukulekelela uMnyango wezeMfundo futhi ababheke nkokhelo.
Okwenziwa yilabo thisha wubuntu njengoba bengabheke nzuzo ngaphandle kokuthuthukisa imfundo futhi uma ngempela bezokwazi ukubambisana kahle nabo bonke abathintekayo, kukude lapho kuzoyiwa khona.
Mkhulu umthwalo kothisha abafundisa abantwana zonke izinsuku ababhekana nawo futhi ziningi izinselelo ezibuye ziphazamise abanye ukuthi bangawukhathuli umsebenzi ngesikhathi ekilasini.
Lokhu okuzokwenziwa ngothisha asebethathe umhlalaphansi kuzokwengeza kokwenziwa ekilasini, okuzobasiza kakhulu abantwana.
Siyathemba-ke ukuthi uma labo thisha sebeqala beya ezikoleni beyoxoxa nothishomkhulu nezinyunyana ngezinhlelo zabo kuzobanjiswana, kungabi bikho abantu abazobona sengathi bafuna ukugxambukela.
Kuyaziwa ukuthi kwesinye isikhathi uma kuqhamuka abantu abangekho ezikoleni nezinhlelo zokulekelela kwesinye isikhathi usizo lugcina lungafinyelelanga ezinganeni ngoba othisha nezinyunyana ababambisani nabo.
Empeleni kuyaye kube yibo abavimbayo ngoba benezabo izinto abakholelwa kuzo futhi kokunye basuke bebona sengathi labo bantu beze ngenhloso yokuzoveza ukuthi kukhona abangakwenzi kahle.
Siyathemba nawo uMnyango wezeMfundo ngeke ubavimbe labo thisha ngoba nawo uyaba yisiphazamiso kokunye.
Okukhulu sifisa sengathi banganda abenza njengalabo thisha, bafake isandla ukuze kuthuthuke ezemfundo.
Sengathi bangasukuma nabanye othisha asebethathe umhlalaphansi kwezinye izindawo basize nabo. Kungagcini ngothisha kodwa nabanye kweminye imikhakha balekelele kweyabo imikhakha lapho bebona kuxega khona.
Njengokuthi nje intsha engonjiniyela ingasiza ukufundisa iMaths ngezimpelasonto, izintatheli zingasiza ukufundisa izilimi nabanye ngokunjalo.