Eyama-labour brokers ingenze ngazithemba izinyunyana
MHLELI: Kudingeke aze abuye komunye umzuliswano esefake esinye isembatho sokulwa uMnumzane Zwelinzima Vavi ukuze angqimuze ama-labour brokers awalahle phansi.
Phela kuzokhumbuleka ukuthi esekuCosatu wake wayilwa le mpi. Isisho sesiZulu siyasho-ke belu ukuthi ukuhlehla kwenqama akusho ukubaleka kodwa ukuthatha amandla. Angisiye umuntu okholelwa kwinyunyana nakuyena uVavi kodwa impi ayinqobile yokuqeda ama-labour brokers inginike omunye umuzwa yabuyisa isithombe nokuthemba ubungako nobunjalo bamandla azo.
INumsa, Cosatu Saftu kanye nezikaBonginkosi Blade Nzimande kuphumela obala ngokungahambisani nendlela abakholelwa wukuthi ixhaphaza abasebenzi ngokubenza itoho isikhathi eside. Inkantolo muva nje ivumelene nenyunyana engusondonzima esanda kubunjwa eholwa ngumakadebona kwezabasebenzi, uVavi. Kufanele ukuthi lapho ekhona izihlathi zivakashele izindlebe.
Kuke kwagcwala imigwaqo kuliwa nenkohlakalo eyenziwa yilezo zinkampani kodwa kwanhlanga zimuka nomoya. Kodwa ngiyesaba-ke mina ukuthi kusazothatha isikhathi eside ukufezeka kwephupho loVavi.
Umbuzo wami uthi abathintekayo bazoqashwa ngokugcwele yinkampani abasebenza kuyo nomo yi-labour broker ebasisile? Ake ngithi nje nangu uThomas Jefferson uqashwe nguDavid Cameron ukuba asebenze Ezikhenceni, sekuphele izinyanga ezintathu. UThomas uzoqashwa ngokugcwele abhaliswe nguDavid Cameron noma Ezikhenceni?
Nginokudideka lapho kodwa ekusukeni bengicabanga ukuthi uzoqashwa yindawo aqashelwe yona kodwa kwabakhona ukudideka sengicabanga ukuthi hleze kube yi-labour broker yakhe.