I-Downs ifuna ukuqeda ishobolo
IMAMELODI Sundowns iphupha ngokuqeda ishobolo lokuyiqala kabi isizini, osekuphenduke isifo saminyaka yonke ngaphansi komqeqeshi uPitso Mosimane.
ISundowns izovula isizini kwiAbsa Premiership neKaizer Chiefs eLoftus Versfeld ngoMgqibelo ngo-3 ntambama. La maqembu aseke abhekana emdlalweni weShell Helix Ultra Cup eFNB Stadium emasontweni adlule.
Kulo mdalo iSundowns idlalise abadlali abangajwayele ukudlala, yanqoba ngo 2-1
Ukaputeni weSundowns, uHlompho Kekana uthe nakuba benemidlalo eminingi kodwa akukho okukhulu okudlula ukuqala isizini ngeChiefs ekhaya.
Ngesizini edlule iSundowns ikhale ngaphansi ngo 2-1 koweligi eLoftus. La maqembu abambane ngo 0-0 emzuliswaneni wesibili.
“Ngiyalithanda ibhola ngoba akuyi ngokuthi abantu balibuka kanjani kodwa kuya ngokuthi udlala kanjani ngosuku lomdlalo.
Okwami neqembu lonke ukuzinikela enkundleni. Uma sikwenza kahle lokho sinethuba lokuwuwina umdlalo. Kukhulu okubhekwe kithina kuwona womabili amaqembu.
IChiefs ayilona nje noma yiliphi iqembu ongaziqhathanisa nalo. Iyizingqungqulu ebholeni laseMzansi. Uma sidlala nayo sigqugquzeleka ngokuphindiwe ngoba sisezingeni elifanayo nayo.
Ngicabanga ukuthi uma sidlala kuyiyona ebhekiwe, kuzoba wusuku oluhle kithina,”kusho uKekana.
Nakuba kubalulekile ukuqoqa amaphuzu kusakhanya kwiSundowns kodwa isililo esikhulu esokuwina iMTN 8, okuyiyona yodwa indebe engakaze ingene ngaphansi kobuholi bukaMosimane.
I-MTN 8 yethulwe ngokusemthethweni ePark Station, eGoli izolo emini phambi kwabalandeli.
ISundowns izobhekana neLamontville Golden Arrows. Imidlalo izoqala ngempelasonto ka-Agasti 11 no-12. Emasontweni adlule uMosimane ubebalisa ngokuthi uyafisa ukuqala kahle isizini njengawo woke amaqembu awine iMTN 8. Lo mqeqeshi useziwine zonke izicoco kwiPremiership ngaphandle kweseMTN 8. UMosimane ugcine ukuwina le ndebe isabizwa ngeSAA Supa 8 esaqeqesha iSuperSport United.
“Sigqugquzelwa wukuthanda ibhola nezinto esifuna ukuzizuza. Sifuna ukuba yiqembu elilethe izindebe eziningi eChloorkop,” kusho uKekana.
IChiefs inengcindezi yokujabulisa abalandeli emuva kwendlala yamasizini amathathu ngaphansi komqeqeshi uSteve Komphela, ogcine eshiyile. Kubhekwe ukuthi umqeqeshi uGiovanni Solinas ayithole imvume yokusebenza eMzansi ingakashayi impelasonto. Mamelodi Sundowns v Lamontville Golden Arrows (3pm, Lucas Moripe Stadium); Kaizer Chiefs v Free State Stars (6pm, FNB Stadium); Orlando Pirates v SuperSport United (8.30pm, Orlando Stadium).
Maritzburg United v Cape Town City (3pm, Harry Gwala Stadium).