IChiefs ayiphumeli obala ngomdlali waseMadagascar
AKUKACACI ukuthi uzofika nini umdlali weKaizer Chiefs othwelwe ngeqoma ukuvala isikhala sikaReneilwe “Yeye” Letsholonyane kuleli qembu laseNaturena.
Njengoba imidlalo ye-Absa Premiership iqala kule mpelasonto, iningi lamaqembu selinabo bonke abadlali ekhempini elibasayinisile. Kodwa kuze kube manje, u-Andriamirado “Dax” Hasina Andrianarimanana waseMadagascar akabonwa nangokhalo kwiChiefs.
Phakathi kwemibiko eshiwoyo ngokungafiki kwakhe kuthiwa ubanjwe amaphepha amgunyaza ukuzodlala kuleli. Kuthiwa la maphepha abanjwe iqembu abelidlalela ngakubo iFosa Juniors okuthiwa aleneme ngendlela iChiefs emsayine ngayo lo mdlali.
Ngokusho kwaleli qembu, uDax unenkontileka nalo ezophela ngo-2020. Kodwa uDax uyakuphika ukuthi kukhona akusayina njengoba ethi iligi yangakubo ngeyama amesha, ngakho akukho okusayinwayo.
“Engingakusho nje ukuthi sizokhipha isitatimende ngamalungiselelo esizini yethu,” kusho uVina Maphosa okhulumela iChiefs ebuzwa yileli phandaba ngoDax izolo.
AmaKhosi abukeka esahlanganisa njengoba ekhale ngaphansi kwiMamelodi Sundowns ngo 2-1 kwiShell Helix Cup. Ngempelasonto edlule iChiefs ishaywe iCape Town City ngo 1-0 kwiMpumalanga Cultural Experience Cup. Kuyona yomibili le midlalo uGiovanni Solinas wase-Italy ongumqeqeshi omusha wayo, ubengabonwa ebhentshini njengoba esalungisa amaphepha okusebenza kuleli. UMaphosa akaphumelanga obala ekutheni ngabe ngoMgqibelo uma iChiefs isidlala neSundowns koweligi, uSolinas uzobe ekhona yini ebhentshini.
Leli phephandaba liphinde lahosha ukuthi umqeqeshi weziMpofana uSolinas osejimise iqembu amasonto amabili, ukhombe uSiphosakhe Ntiya-Ntiya, Given Thibedi, Yusuf Bunting noNkosingiphile Ngcobo eqenjini leMultichoice Diski Challenge (MDC).
Laba badlali bese kunesikhathi bezicija neqembu elikhulu ngethemba lokuthi sebezozinza khona.
“Ukuziqeqesha kweqembu uma kusalungiselelwa ukuqala kwesizini, akufani nokuziqeqesha kweqembu uma selilungiselela imidlalo. Kusuka kusasa (esho namhlanje), iqembu lizobe selilungiselela isizini entsha, ngakho ukuziqeqesha kwethu kuzokwehluka kakhulu. Uma isizini ingakaqali kunomehluko ngoba bonke abadlali bayabizwa, bese kuthi ngesikhathi kuqhutshekwa umqeqeshi enze izinqumo zokuthi umdlali othize umdinga kuphi ngaziphi izizathu,” kuchaza uMaphosa.
Nangesizini edlule, uNtiya-Ntiya, Ngcobo noBunting bebeyibamba kwiMDC bashaya into ecokeme njengoba benqobe nesicoco seMultiChoice Diski Shield.
UNtiya-ntiya uke wasetshenziswa uKomphela esikwatini esikhulu ezovala isikhala kwesokunxele emuva.