Bamashele osolwa ngokubulala umfundi
ABAFUNI athole ibheyili umlisa (28) waseWaterloo osolwa ngokubulala intombazanyana eneminyaka eyisikhombisa, ngoMgqibelo.
Amalungu omphakathi akule ndawo, othisha nabafundi baseSibonginhlanhla Primary bamashe ngaphandle kwenkantolo izolo bethi akanganikwa ibheyili osolwa ngokubulala umfundi kaGrade 2, uSithembile Miya.
UMnuz Laston Moodley kusolwa ukuthi ubulale uSithembile ngemuva kokumdlwengula kodwa usabekwe icala lokubulala kuphela, alikavulwa elokudlwengula ngoba kusalindwe ukuhlolwa kwesidumbu okuthiwa sitholwe sinqunu.
Umsolwa kuthiwa ubengumngani kababomncane kamufi.
Ubabomncane kamufi uMandla Myaka uthe usashaqekile ngalesi senzo okuthiwa senziwe obewumngani wakhe, abebenza naye umculo we-hip hop.
“Ubeseke wangivakashela kaningana umsolwa njengoba besicula ndawonye siqopha umculo. Kwenzeka lesi sigameko nje mina bengisanda kuthutha kuleli fulethi ebesihlala kulo nogogo nengane kabhuti (Sithembile) lapho umsolwa ebengumakhelwane wethu khona,” kuchaza uMyaka.
Ubabekazi kaSithembile, uNksz Zinhle Myaka obengakwazi nokuzibamba ekhihla isililo, uthe ingane kamfowabo ibulawe ngesihluku esikhulu.
Uthe igwazwe esifubeni ummese waphumela emhlane yabekwa ephaseji ebhilidini lapho behlala khona. UNksz Myaka uveze ukuthi uyise wengane ushone ngo-2016 kanti unina wamshiya noyise esenezinyanga ezimbili bangaphinde bambona. “Kade sasimbheka unina kaSithembile, uNksz Thobsile Mila saze sabhala nakwelinye iphephendaba kodwa imizamo yethu ayiphumelelanga.” Uthisha kaSithembile, uNksz Nqobile Zungu waseSibonginhlanhla Primary uthe baphuke izinhliziyo ngokwenzekile, basabela ngisho nezinye izingane zakulesi sikole. “Ngifisa angayitholi ibheyili. Usengaze abulale ingane encane kangaka ngesihluku esikhulu kanje? Angayitholi ibheyili ngoba usengaphinde abulale enye ingane.”
IMantshi u-Irfaan Khallil ithe okwamanje uMoodley ubhekene necala lokubulala, okunye kusaphenywa.
“Inkantolo ibonile ukuthi bekukhona umbhikisho ngaphandle kwenkantolo, nikhumbule ukuthi inkantolo ayikhethi zinhlangothi. Siphinde sabona ukuthi baningi abantu abafuna ukulandela leli cala kepha inkantolo incane, ngeke ikwazi ukuthi ifake wonke umuntu,” kusho uKhallil.
UKhallil uthe uMoodley uzohlala esitokisini kanti icala lihlehliselwe u-Agasti 10 nonyaka.