Aphikisayo amashile efuna uhulumeni ehlise uphethroli ngeRandi
AMAQEMBU aphikisayo, ngaphandle kwe-EFF ne-UDM, ahlangane neDA ne-Outa emashela ukuthi uhulumeni ehlise ilitha likaphethroli ngoR1.
Izolo i-ACDP, Cope, Freedom Front Plus neForum For Service Delivery baseke umkhankaso weDA, Outa, National Taxi Alliance (NTA) neSantaco wokuthi kwehliswe uphethroli.
Imashi iphele emahhovisi oMnyango wezeziMali asePitoli. Uphethroli uzonyuka ngesenti namhlanje kanti uMengameli Cyril Ramaphosa uzoba neLekgotla yeKhabhinethi ezothatha izinsuku ezintathu. UMnuz Ben Theron we-Outa uthe uRamaphosa kufanele abuyise uR100 billion okusolwa ukuthi wathathwa ngabakwaGupta bayowutshala eDubai, ukuze awusebenzisele izindleko zikaphethroli.
“Uphethroli wethu ubiza ukudlula owaseLesotho, Swaziland nowaseBotswana. UR100 billion owebiwa ungasiza ukwehlisa intengo kaphethroli,” kusho uTheron.
Umholi we-ACDP uMnuz Kenneth Meshoe utshele abamashayo ukuthi ilitha likaphethroli eBotswana libiza uR10.91, eLesotho libe wuR11.05, eSwaziland libe wuR12.78, eNingizimu Afrika ethumela uphethroli kula mazwe libize uR15.80.
Umholi weDA uMnuz Mmusi Maimane uthe:“Intela ekhokhwa uma uthenga impahla inyukile, ekagwayi notshwala, ugesi unyukile kodwa izibonelelo zikahulumeni azinyuswanga ngendlela ezosiza abantu ukuthi baphile. Phezu kwakho konke lokhu kulokhu kunyuke uphethroli. Lokhu kusho ukunyuka kokudla nemali yokugibela.” Uthe abampofu abasakwazi ukuphila ngenxa yokuthi yonke into imba eqolo.
Ucele uhulumeni ukuthi eze nohlelo lokwehlisa intela kaphethroli ngoba uR5.30 kuwo wonke amalitha kaphethroli athengwa ngabantu ngowentela.
Ucele ukuthi kube nenkulumo mpikiswano ngodaba lwentela kaphethroli eya kwiRoad Accident Fund (RAF) nenye intela ethinta uphethroli.