Kunzima kowakhe esizeni somuntu
USENGCUPHENI yokulahlekelwa isithabathaba somuzi umndeni waseSikhaleni, eMpangeni, osuthole ukuthi wadayiselwa ngokungemthetho isiza sawo.
Ukhala ezimathonsi uNkk Nqobile Mkhwanazi, osecabanga ukuvele awudilize umuzi awakha ngemali yesinxephezelo somyeni wakhe owalimala engozini yemoto. Utshele Isolezwe ukuthi wathenga isiza ngo-2013 esasibiza uR120 000, wakha nomuzi. Uveze ukuthi walandela konke okwenziwa uma uthenga isiza, wathola nencwadi yetayitela. Ngo-2014 kwafika abazibize ngabanikazi balesi siza, abathe abakaze basidayise. UNkk Mkhwanazi uthe athenga kuyena isiza naye wayesidayiselwe ngomunye okusolakala ukuthi nguyena owakokotela omazisi babanikazi baso.
“Angisazi yini engizoyenza yingakho sengibona kungcono ngiwudilize umuzi. Icala selibuya ngisho enkantolo ngo-2015 ngatshelwa ukuthi isiza kumele sibuyele kubanikazi baso. Ngesonto eledlule ngithole ucingo kuthiwa angizosayina ukuthi ngiyavuma ukuthi isiza sibuyele kubanikazi,” kubalisa uNkk Mkhwanazi.
Umuzi ongase umlahlekele wambiza uR400 000 ukuwakha, unamakamelo amane okulala, ikamelo lokuphumula, elokudlela, ikhishi, amagaraji amabili nezindlu zokugeza ezimbili ezinamathoyilethi. Ingozi alimala kuyo umyeni wakhe yamshiya engakwazi ukuhamba njengoba esebenzisa isihlalo esinamasondo.
UNkk Mkhwanazi uthe uyile kobika udaba kuMasipala waseMhlathuze ngoba isiza siselokishini, bathembisa ukululandela.
Okhulumela uMasipala, uMnuz Mdu Ncalane uvumile ukuthi lwafika kubona udaba kodwa akukho abangasiza ngakho.
Uthe abakutholile wukuthi indawo okwakhiwe kuyo umuzi ayikho ngaphansi kukamasipala.
“Ukungenela kwethu kwakuwukubheka ukuthi isiza esikabani. Ngeke sikwazi ukungenela ngoba lena yindawo ezimele engekho ngaphansi kukaMasipala. Sameluleka uNkk Mkhwanazi ukuthi azame abameli ukuxazulula lolu daba,” kusho uNcalane.
Isolezwe lizamile ukuthola umnikazi wesiza, oshayelwe emahhovisi akhe okusebenza ngoMsombuluko kwathiwa usaphumile. Intatheli ishiye umyalezo nenombolo yocingo. Izolo kuthiwe uxinwe umsebenzi futhi ngeke abe khona ehhovisi usuku lonke. Omunye owesilisa osebenza enkampanini yakhe, uthe uyalwazi udaba kodwa kumele kuthintwe ngqo umnikazi walo. Kushaye isikhathi sokushicilela engatholakali.