Zijikile izinto eZim kukhethwa umengameli omusha
NGEMUVA kweminyaka engu-38 zijikile izinto ezweni elingumakhelwane weNingizimu Afrika, iZimbabwe. Uyathanda akathandi uMnuz Robert Mugabe obesephathe yonke le minyaka, ushintsho lwenzekile eZimbabwe ngemuva kokhetho lokuqoka umengameli omusha.
Kudumazile nokho ukuthi ngaphambi kokuqala kokhetho ngoMsombuluko uMugabe aqhamuke nenkulumo etshengisa ukuthi usayibambele igqubu iZanu PF ngokumkhipha esikhundleni.
UMugabe uveze esithangamini nabezindaba ukuthi ngeke ayivotele le nhlangano ngoba yamkhipha esikhundleni ngoNovemba nyakenye.
Ukukhuluma kanje kukaMugabe kuqubule imibuzo yokuthi ngabe izimiso nomthethosisekelo weZanu PF sekushintshile yini njengoba esethi ngeke ayivotele?
Akuqali ngaye uMugabe ukukhishwa esikhundleni yiqembu lakhe ebusa, nalapha eNingizimu Afrika sekusehlele kabili selokhu kwabusa intando yabantu.
Kwaqale kwesula uMnuz Thabo Mbeki ngo-2008 kwathi ngoFebhuwari nonyaka wazibeka phansi uMnuz Jacob Zuma.
Bobabili baphume ezikhundleni ngenxa yengcindezi ebiqhamuka eqenjini abebelihola, i-ANC. Ebuholini, kungekhona kwipolitiki kuphela, kuhamba kuhambe imibono yehluke futhi uphele noshatini.
Ngakho besingekho isidingo sokuthi uMugabe akhulumise okwengane encane engaziqondi izimo zobuholi nezimo zezepolitiki. Yize kungemnandi ukukhishwa esikhundleni usabusa kepha umuntu osezingeni lakhe umelwe wukutshengisa ubuqotho.
Lokho ubengakwenza ngokuthi agqugquzele abantu ukuthi baphume ukuyovota kunokuphawula ngale ndlela esibona sengathi ubehlose ngayo ukususa udungunyane njengoba ephawule ngosuku olwandulela ukhetho.
Siyethemba ukuthi abantu baseZimbabwe bazoqhubeka nokuba yisibonelo e-Afrika ngokuqhakambisa ukuthula njengoba nezingqapheli bezikuveza ukuthi ukhetho belukhululekile futhi lunokuthula.
Ukhetho lwaseZimbabwe luyasithinta siyiNingizimu Afrika, yingakho sifisa ukubona ushintsho obese lulindwe iminyaka ngabantu bakuleliya lizwe, luguqula impilo yabo iba ngcono.