Kufundwa nezifundo zamakhono eZwelibanzi
AKUBONA bonke abafundi abaya enyuvesi noma emakolishi beyozicijela imisebenzi.
Kunezizathu eziningi zalokho. Phakathi kwazo kukhona nokuthi umfundi ngesikhathi esesesikoleni ubebonakala ukuthi ubukhali ngasekhonweni elithize uma kufundwa ekilasini, akamuhle kahle ezifundweni noma kube wukuthi ayikho imali yokuqhuba izifundo.
UNkk Nonhlanhla Ngwenya, iHOD yaseZwelibanzi High, eseMlaza uthe kungaleso sizathu isikole sabo sakhetha ukugxila ekufundiseni kakhulu izifundo zamakhono ukuze abafundi abangakwazanga ukuyofunda emakolishi baphume esikoleni benamakhono abangaziphilisa ngawo.
Uthe kulesi sikole ezinye izifundo abazifundisayo ziyefana nezifundo ezifundwa emakolishi okucijwa amakhono aziwa ngamaTVET. Umfundi unikezwa ithuba lokuzikhethela ukuthi yini athanda ukuyenza. Ngaphandle kwezifundo ezijwayelekile kufundwa izifundo zamakhono okuyi-Agricultural Science, Civil Technology esiza abafuna ukwakha, Consumer Studies, Engineering Graphics and Design, Hospitality Studies, Information Technology, Maritime Economics, Tourism neVisual Arts. Umfundi unikwa ithuba lokukhetha uma esekwaGrade10.
“Le ndlela yokufundisa kumele ngabe isiza abafundi abaningi ukuze babe ngosomabhizinisi emikhakheni abayithandayo kodwa lokho akukenzeki kahle ngoba iningi likhetha izifundo lilandela abangani. Uthola ukuthi umfundi unekhono nothando lwenye into kodwa ngenxa yokuthi umngani wakhe wenza okuhlukile ugcina elandele yena. Siyazama ukubasiza abafundi ngokuthi bakhethe izifundo belandela abakuthandayo kodwa kusenzima. Siye sikhulume nabazali ukuze nabo basize,” kusho uNkk Ngwenya.
Uqhube wathi kulesi sikole abafundi bafika ngo6.30 beze ekilasini lasekuseni bezikhumbuza nangomsebenzi abebewenzile bese kuthi ukufunda kwangalolo suku kuqale ngo-8 ekuseni kuphele ngo-3 ntambama. Emva kwalokho kuqala ikilasi lantambana eliphoqelekile ku-matric wonke eliphela ngo-6 ntambama.
Uthe amakilasi okutadisha ngaphambi kokuqala kwamakilasi benza abe yimpoqo ngoba iningi labafundi liyehluleka ukuzifundela lodwa emakhaya.
“Uma singathembela ekutheni bayatadisha emakhaya ngabe siyazikhohlisa njengoba iningi labo likhonze ukusebenzisa amaselula. Nakhona kulawo makilasi abanye babo bayaputshuka ubafice bezivulile izincwadi kodwa bezicofela izingcingo. Siye sithi uma sibuka lokhu sibone ukuthi kusho ukuthi nasemakhaya noma abazali bebanika isikhathi sokufunda kusho ukuthi benza sengathi bayafunda kanti lutho,” kusho yena.
Sekuphele iminyaka engaphezulu kuka-30 lesi sikole singena ngalesi sikhathi. UNkk Ngwenya uthe ngokubona kwabo lokhu kuyabasebenzela.
“Kithina sekuyinto ejwayelekile ukuthi singena ngo-6.30 esikhundleni sokungena ngo-. Uma sekuphume isikole kuba khona othisha abazosala nabafundi kuye ngokuthi yisiphi isifundo esizofundwa ngalelo langa,” kusho yena.
Phambilini uthe isikole besiphasa ngo-100% kodwa manje sehlile. Uthe akukho abangakukhomba njengembangela yalokho kodwa ziningi izinto abazizamayo ukusiza abafundi. Nyakenye siphase ngo-88% sisuka ku-78% wango-2016.
“Kulo nyaka siqale ukufundisa iMaths Literacy kwaGrade 10 emakilasini amabili kwamane. Sifuna ukubona ukuthi akuyona yini iMaths ebiyenza ukuthi abafundi bafeyile. Inkinga esisenayo okwamanje wukuthi abafundi abayizwa kahle eyokufunda iMaths Literacy, bacabanga ukuthi ngeke baye ndawo uma befunda yona. IMaths Literacy iyasebenza empilweni ngoba ikufundisa ukubala izinto esizisebenzisa njalo, sicabanga ukuthi abafundi abangenazo izinhlelo zokuthatha imikhakha yokuqhubeka nezifundo zezibalo kungabasiza ukukhetha yona,” kusho uNkk Ngwenya.
Ngaphandle kokufunda kulesi sikole kuba nomcimbi wokukhetha unobuhle, uMiss Zwelibanzi High, nowokujwayeza abafundi abafikayo iBashas’s Freshers Concert esuke inedili lomculo abafundi bekhombisa ngamakhono abo endimeni yokuzijabulisa.
UNkk Ngwenya uthe le micimbi yenzelwa ukuthi abafundi bame kancane ukufunda bazijabulise futhi nemiqondo yabo ilungele ukufunda.
“UMiss Zwelibanzi High wenziwa ngaphambi kokuthi kuqalwe izivivinyo zekota yesithathu kanti iBasha’s yenziwa kusanda kuvulwa,” kusho yena.