Umlando kwiTV ngowesiNdebele
KUZOQOPHEKA umlando esiteshini sakwaSABC1, njengoba ngoSepthemba kuzoqala umdlalo othi Ikani, ozobe kukhulunywa kuwo isiNdebele okuyinto yokuqala ukwenzeka kuleli emlandweni wethelevishini.
Umdlalo Ikani uzobe ubophele osaziwayo abahlukene abanamava ekulingiseni, okukhona kubo uFlorence Masebe.
Lo mdlalo uzoqala ngoSepthemba 30, ngo-7.30 ebusuku.
Inhloko yakwaSABC1, uClara Nzima ithe kuwumlando lokhu kubona nasemlandweni wakwaSABC.
“Emlandweni wethelevishini nemidlalo yakuleli kuyaqala ukuthi kube nomdlalo ofana nalona.
Lokhu kuphendule izicelo zabaningi zokuqhubeka sikhombise ngemidlalo ekhuluma izilimi ezihlukene zakuleli,” kuchaza uClara.
Uthe lo mdlalo ulungele umndeni wonke njengoba ubheka indaba kaKhaya Hlophe, othungatha imvelaphi yakhe.
“Umdlalo ozojatshulelwa iningi futhi bawujabulele kakhulu ukuthi ukhonjiswe kwaSABC1,” kuchaza uClara.
Kulesi siteshi kuzophinde kuqale nomunye umdlalo othi Emjindini, ozoqala ngoSepthemba 16, ngo-8 ebusuku.
Uzobe uvala isikhala somunye omusha oqale ngoJulayi 22, othi Emoyeni.
Lo mdlalo ukhuluma ngabasebenzi basemayini esineminyaka engu-100, okukhona kubo u-Amos osebenza ngokuzikhandla nabanye usuku nosuku ukuthuthukisa umnotho wemayini kodwa bona ongabazuzisi ngalutho.
“Laba basebenzi bahlale benomsebenzi omningi futhi benegcindezi, ngenxa yokuthi bahlale bezikhandla futhi besebenza kanzima. Ngelinye ilanga kuvela ingozi futhi bayavaleleka emgodini,” kuchaza uClara.
Uthe ngesikhathi bevalelekile bayazama ukuphuma emgodini kodwa bahlangabezana nobunye ubunzima, obubenza bagcine bevaleleke kakhulu.
“Ngesikhathi u-Amos ezama ukuthola indawo yokuphuma kulo mgodi uhlangana nesikhwama esigcwele ubucwebe begolide obudala. Lobu bucwebe bungasiza umndeni wakhe uphume enhluphekweni obhekene nayo, kodwa kumele athole indlela yokubufihla lobu bucwebe ukuze aphume nabo futhi bungabonwa muntu ukuze abushintshe athole imali. Umbuzo uwodwa, engabe uzophuma nabo lobu bucwebe?” kubuza uClara.
Uthe bayathemba ukuthi ababukeli bazoyijabulela le midlalo emisha esiteshini sabo.