UDube uncoma ukufika kukaZwane kwi-Arrows
UMDLALI wasemuva kwiLamontville Golden Arrows, uSiyabonga Dube, ubona kuyithuba lokufunda okuningi ukufika kukaSiyanda Zwane kuBafana Bes’thende obolekiswe iMamelodi Sundowns isizini yonke ka-2018/2019.
Nakuba abaningi bengakubona njengombango wejezi ozoshuba phakathi kwalaba badlali bobabili abadlali ophikweni lwesokudla emuva kodwa uDube uthi njengomdlali osemncane ukushayela ihlombe ukufika kwalo makadebona ngoba uzofunda okuningi kuyena.
“Ngiyakujabulela ukuthi sizobanga naye ijezi ngoba ngifisa ukufunda okukhulu kuyena ngoba useke wadlalela elinye lamaqembu athathwa njengamakhulu ngakho kuzongilekelela kakhulu ekukhuleni njengomdlali.
“Umqeqeshi wethu (esho uClinton Larsen) uyaye esitshele ukuthi kufanele ukujabulele ubanga indawo nomdlali ohlonishwayo ngoba kuyakhulisana. Nginethemba lokuthi uma kukhethwe mina ukuqala umdlalo uzongeseka njengoba nami kuzothi uma kuqale yena umdlalo, ngimeseke,” kusho uDube.
Sekuwumlando ukuthi uZwane uke wagijima kwiArrows eminyakeni edlule njengoba ayeseqenjini elanqoba iMTN 8 lehlula i-Ajax Cape Town kowamanqamu ngo-2009. UZwane ushiye kuBafana Bes’thende ngo-2014 ngemva kokugawulwa yizembe.
UDube uthi ukufika kukaZwane, akusizi nje yena kuphela kodwa kuningi alekelela ngakho iqembu.
“Ziningi izinto asisiza ngaso eqenjini. Okubalulekile ngaye ukuthi uyinsizwa enomoya omuhle, okulula ukuthi uxoxe nayo, nengicabanga ukuthi sisazoqhubeka silokhu sixoxa ngoba sifisa ukuthi sibambisane njengeqembu ukuze kube khona esikutholayo uma kuphela isizini.”
Abafana Bes’thende bazovula neMaritzburg United ngeSonto kwi-Absa Premiership emdlalweni ozoba seHarry Gwala Stadium eMgungundlovu ngo-3 ntambama.