Ukhala ngokuhlala kuleli kukaKhune
U-BRIAN “Spiderman” Baloyi uthi kuseyisilonda esisekude ukuphola kuyena ukubona u-Itumeleng “Spiderkid” Khune esadlala kuleli, ekubeni ikhono lakhe libatshazwa umhlaba wonke.
UBaloyi obengunozinti weKaizer Chiefs, Mamelodi Sundowns neqembu lesizwe iBafana Bafana eminyakeni edlule,uthi akaqondi namanje ukuthi kungani uKhune engadlali kwelinye lamaqembu amakhulu ahlonishwayo e-Europe.
Eminyakeni edlule,uBaloyi ubebamba kwasani kwiChiefs nakwiSundowns okwenza agcine edlale amahlandla angu-24 kwiBafana Bafana. Kuthe esezowagaxe emgibeni amakhokho, kwagqama uKhune ofike kwezwakala wagcina eqanjwa ukuthi unguSpiderkid, kuthathelwa ekutheni uzoqhubeka lapho kugcine khona uBaloyi.
Bobabili labo nozinti baqhubekile nobudlelwano obuhle, ikakhulukazi uBayoli obelokhu enikeza uKhune njalo amacebo okuvimba. NoKhune ubengakufihli ezinkundleni zokuxhumana noma uma ekhuluma nabezindaba ukuthi ubukela kuBaloyi.
“Ngesikhathi uKhune eqala egqama ngakubeka kwacaca ukuthi njengoba lingafezekanga iphupho lami lokudlala phesheya kwezilwandle, sengifisa ukuthi kube wuyena (uKhune), ofeza iphupho lami ngokuthi ayodlala khona. Ngeshwa akukaze kwenzeke lokho futhi kubukeka sengathi ngeke kusenzeka. Ngenxa yokuthi angifuni iphupho lami lishabalale, ngibona kungcono ngiqale inkulisa ezocija, ikakhulukazi onozinti abasebancane,ukuze bezoyodlala phesheya,” kusho uBaloyi oshiyile kwiChiefs engumqeqeshi wonozinti ngasekupheleni kwesizini edlule.
Ngokusho kukaSpiderman, amaqembu ayibamba kwiPremier Soccer League (PSL) ngabe ikwiAbsa Premiership noma iNational First Division (NFD), kumele ayibukisise indaba yokuvimba konozinti bangaphandle. Uthi lokhu kubulala ikhono lonozinti bakuleli.
“Ngifuna ukubona onozinti abancane benikwa ithuba emaqenjini adlala kwiPremiership. Uma ubuka iNFD kugcwele onozinti bangaphandle, nangapha kwi-Aba Premiership cishe uhhafu wamaqembu uvinjelwa wonozinti bangaphandle. Akusizi-ke ukuhlala phansi dekle bese silokhu sishaya amakhala. Kumele kube khona esikwenzayo ngalokhu. Yingakho maduze nje ngizothula isikhungo esizobhekana ngqo nokukhiqizwa konozinti,” kuqhuba uBaloyi.
Esinye sezikhalo ebholeni lakuleli wukuthi nakuba izinga lokuya kwabadlali bakuleli phesheya kwezilwandle lihamba kancane, kuthi noma sebefikile phesheya bahlale amasizini ambalwa babuye beze kuleli. UBaloyi uthi izinkakha ebholeni lakuleli ezifana noSibusiso “Rhee” Zuma, Lucas “Rhoo” Radebe, Delron Buckley noSiyabonga “Bhele” Nomvethe sekuyisikhathi sokuthi zitshele abadlali abancane ukuthi zenze ngani ukuhlala iminyaka phesheya ngaphandle kwezinkinga.
“Uma sizimisele ngokuthi sihlonishwe futhi senze kahle ebholeni lomhlabakuzofanele sibe nabadlali abaningi abadlala phesheya emaqenjini ahlonishwayo.
Kuyaphoxa ukuzwa umdlali ohambe eminyakeni embalwa edlule esethi useyabuya, ekubeni sisabheke lukhulu kuyena. Sekuyisikhathi sokuthi oZuma, Radebe, Buckley noNomvethe bapotshozele intsha ukuthi bona benze ngani ukuhlala iminyaka engaka phesheya kwezilwandle,” kuphetha uBaloyi.