UJordaan unomuzwa ohlukile ngokusayina kukaTau kwiBrighton
UMENGAMELI weSouth African Football Association (Safa) uDanny Jordaan uthi nakuba kuyinto enhle ukusayina kukaPercy Tau (osesithombeni) phesheya kwezilwandle kodwa unombono owehlukile ngokuthi bekufanele adlale kuliphi izwe.
UTau usayine kwiBrighton & Hove Albion yase-England ngemali ebalelwa ngaphezu kukaR50 million. Ngenxa yokuthi amahlandla asewadlale kwiBafana Bafana mancane (njengoba ewu-12), nokuthi elesizwe lakuleli alikho emazweni angu-50 ahamba phambili emhlabeni jikelele, uTau uzobolekiswa iBrighton emaqenjini akwamanye amazwe ase-Europe enobuhlobo nawo. Imibiko ithi angase alibangise eBelgium noma eHolland. Ekhuluma nezintatheli uJordaan ngesikhathi kunomqhudelwano weSAB Under 21 National Champioship, eKing Zwelithini Stadium eMlaza, lesi sikhulu sakhombisa ukuthi ngokwaso uTau bekufanele adlale kwelinye izwe.
“Sikujabulela kakhulu ukuyodlala phesheya kukaTau njengenhlangano eyengamele unobhutshuzwayo kuleli. Ngiyazi ukuthi bekunombango wokuthi kufanele asayine e-England noma eSpain kodwa-ke ugcine ekhethe i-England. Nginowami nokho umbono ngokuthi bekufanele asayine kuphi kodwa ngizothula nginganitsheli (esho ezintathelini). Ungumdlali onesiphiwo, simfisele konke okuhle. Siyakholelwa ekutheni uzokhula ngoba amaqembu aphesheya ayasiza ekukhuliseni umdlali ngokomqondo,” kusho uJordaan obekubonakala ukuthi unomuzwa owehlukile ngokusayina kukaTau kwiBrighton.
UJordaan uthi umqeqeshi weBafana uStuart Baxter kumele azihluphe ngokuthatha indiza ayobheka abadlali bakuleli abasebancane abazinze phesheya ngenhloso yokuqinisa iqembu lesizwe ukwakhela iNdebe yoMhlaba ka-2020 eQatar. “Akufanele sikhohlwe ukuthi sinabadlali abangaphezu kuka-80 abase-Europe emaqenjni ehlukene. Okubuhlungu abadlali kwiPremier League yase-England noma kwiLa Liga yaseSpain okwenza banganakwa.”