I-Downs ihlule iChiefs kubangwa uLebusa
IMAMELODI Sundowns isiphinde yayithela phansi iKaizer Chiefs kungakangenwa nasenkundleni njengoba iwine umbango womdlali wasemuva we-Ajax Cape Town,uMosa Lebusa.
Lezi zindaba ziqinisekiswe umqeqeshi we-Urban Warriors, uMuhsin Ertugral ngesikhathi ekhuluma ne-Independent
Media, elingaphansi kwayo Isolezwe izolo.
La maqembu ake aba sembangweni ka-Andile Jali, ogcine unqotshwe amaBrazilians. NgoMgqibelo azotholana phezulu emdlalweni we-Absa Premiership eLoftus Versfeld, ePitoli ngo-3 ntambama. Emasontweni adlule iSundowns idlule ngo 2-1 kowobungani.
I-Ajax izobe idlala kwiNational First Division (NFD) kwisizini ezoqala ngemuva kokulahlwa icala ngokudlalisa uTendai Ndoro.
Umqeqeshi weSundowns, uPitso Mosimane, ubesekusho kaningi ukuthi bathungatha umdlali wesokunxele emuva. ULebusa okuke kwavela ukuthi neChiefs iyambheka,uyakwazi ukudlala namaphakathi emuva.
IChiefs idedele uTsepo Masilela noSibusiso Kumalo kanti uPhilani Zulu obedlaliswa kule ndawo uSteve Komphela kuthiwa umqeqeshi omusha uGiovanni Solinas ufuna ukumbuyisela esiswini lapho ebedlala khona esakwiMaritzburg United. Ezinye ezivelile ezokuthi umdlali osemncane uSiphosakhe NtiyaNtiya oke wayibamba kwesokunxele uSolinas umbuyisele eqenjini leMultichoice Diski Challenge. Leli qembu lisayinise uLethlogonolo Mirwa obedlala kwiBuya Msuthu kwi-ABC Motsepe League. Lokhu kulushiya luxega uhlangothi lwesokunxele emuva kuMakhosi.
“ULebusa usesibenzele kahle. Uyalishiya iqembu uyojiyina iSundowns futhi ngicabanga ukuthi uzokwenza kahle khona,” kusho u-Ertugral.
Okhulumela iSundowns, uThulani Thuswa ebuzwa ngoLebusa akazange aphumele obala.
“Akukho esizokusho. Sizomemezela uma kukhona esifisa ukukusho.” Lo mdlali ozofika kwi’Downs abange indawo noTebogo Langerman,Siyabonga Zulu noLyle Lakay uMosimane amubambise kule ndawo ngesikhathi bedlala owobungani neChiefs.
ISundowns ithola uLebusa nje emasontweni edlule ibamba lomqeqeshi kwiChiefs,uPatrick Mabedi, like lakuveza ukuthi bayamubheka lo mdlali.
Ngasohlangothini lwe-Ajax, u-Ertugral uthe ngeke ayeke ukubheka isicelo somsebenzi waphesheya uma sivela.
“Iqembu lihlelekile. Ishwa nje ukuthi inkinga ebikhona ayizange ixazululeke ngokushesha. Ibhola laseNingizimu Afrika liyayidinga i-Ajax Cape Town. Ahlezi ekhona amathuba aseTurkey naseSaudi Arabia. Uma eqhamuka ngizowabheka. Kodwa okubalulekile okwamanje wukuhlanganisa iqembu eliselincane elizokwazi ukuncintisana kwiNFD. Leli yithuba lokwakha kabusha,” kusho u-Ertugral.
Uthe unethemba lokuthi i-Urban Warriors izokwazi ukubuyela esigabeni esiphezulu ngokushesha njengoba kwenzeke kwiHighlands Park neLamontville Golden Arrows kumasizini edlule.
Imidlalo ye-Absa Premiership yangempelasonto:
NgoMgqibelo: Mamelodi Sundowns v Kaizer Chiefs (Loftus Versfeld Stadium, 3pm); Black Leopards v Polokwane City (Peter Mokaba Stadium, 6pm); Cape Town City FC v SuperSport United (Cape Town Stadium, 6pm); Bidvest Wits v Free State Stars (Bidvest Stadium, 6pm); Orlando Pirates v Highlands Park (Orlando Stadium, 8.15pm); AmaZulu FC v Baroka FC (King Zwelithini Stadium, 8.15pm)
NgeSonto: Maritzburg United v Golden Arrows (Harry Gwala Stadium, 3pm); Bloemfontein Celtic v Chippa United (Dr Molemela Stadium, 3pm)