Kwengezwe isikhathi ngombiko wentela

KULINDELWE ukuthi umbiko wekomiti ebelibheka ukwengezwa kwempahla engafanele ukukhokhelwa iValue Added Tax (VAT) uthulwe ngokusemthethweni ngoMsombuluko.

Lo mbiko bekulindeleke ukuthi uthulwe ekupheleni kukaJulayi kodwa uMnyango wezeziMali wengeza isikhathi sokuthulwa kwawo ngesonto njengoba usulindelwe ngo-Agasti 6.

UMnuz Leonard Willemse oyisazi sentela enkampanini iMazars uthe osomabhizinisi kufanele bawuthole lo mbiko ukuze basheshe bafake yonke impahla engafanele wukukhokha intela ohlwini olufanele.

“Osomabhizinisi kufanele bakhokhe iVAT kwaSouth African Revenue Services ngakho kufanele benze isiqiniseko sokuthi emabhizinisini abo kunohlu lwayo yonke impahla okufanele ikhokhe intela,” kusho uWillemse.

Uthe okwenze uMnyango wezeziMali ulule isikhathi wukuthi abantu bafuna amaqakelo, amakhandlela nensipho afakwe ohlwini lwempahla engayikhokhi intela.

“Uhulumeni uze nalolu hlelo ngoba efuna ukwehlisa umthwalo emahlombe abantu. Njengamanje kungu-19 ukudla okungayikhokhi iVAT okukhona kukho isinkwa esinsundu, impuphu, istambu, amaveji, amaqanda nokunye. Abantu bafuna kufakwe amaqakelo, tampons, uflawa, amakhandlela, insipho, imithi ebalulekile okubalwa eyenzinhlungu, eyomkhuhlane, umfaniswano wesikole, izincwadi ne-airtime,” kusho uWillemse.

Uthe ikomiti libhekene nomsebenzi onzima ngoba kufanele licabangele abampofu liphinde licabange nesikhwama sikahulumeni esidinga imali.

“Uhulumeni wanyusa iVAT isuka ku-14% yaya ku-15% ngoba efuna ukungenisa imali esikhwameni sakhe. Kufanele ikomiti lehlise umthwalo emahlombe abantu njengoba kunyuke yonke into. Lona futhi leli komiti kufanele lizame ukufaka imali edingwa wuhulumeni, unzima umsebenzi walo. Sikhumbuza osomabhizinisi ukuthi baqaphele izinguquko ezizoba khona ukuze bangabi senkingeni uma sebekhokha intela,” kusho uWillemse.