Ugqabule igoda wabuyela kwiChippa
USEBUYELE kwiChippa United umdlali wasemuva, uNkosinathi Mthiyane, ohlukane ne-Orlando Pirates emasontweni adlule.
UMthiyane uzicelele ukukhululwa yiPirates emva kokuchitha isigamu sesizini edlule ebolekiswe kwiChilli Boys. Ubelizwa ngendaba ijezi kweZimnyama ngaphansi kwabaqeqeshi abahlukene.
Emuva kwesokunxele kweZimnyama uMthiyane ubekade ebanga ijezi no-Innocent Maela osephenduke isethenjwa somqeqeshi, uMilutin “Micho” Sredojevic noMarc van Heerden osebuyele kuMaZulu. UMthiyane, obekuvele ukuthi angase asayine kwiRoyal Eagles edlala kwiNational First Division (NFD) abekade eziqeqesha nayo, unqume ukubuyela kwiChippa kaSiviwe Mpengesi.
“Ngibuyele kwiChippa. Ngisayine inkontileka yonyaka. Bekufanele ngithole iqembu ukuze ngibuyele ensimini. Kunzima ukuthola iqembu uma usunesikhathi ugcinile ukudlala. Ngijabule ikakhulukazi ngoba ngizosebenza nomqeqeshi ongaziyo (Dan Malesela). Okubalulekile okwamanje ukuthi ngidlale,” kusho uMthiyane.
Sekuyinto ejwayelekile ukushintshana ngabadlali phakathi kwePirates neChippa. Nokho kubukeka kungawasebenzeli womabili la maqembu kwazise abadlali asuke eshintshane ngabo bayahluleka ukushaya into ecokeme kuwona emuva kokugcogcoma. Ngaphandle kukaMthiyane noVan Heerden abahlulekile kwiPirates besuka kwiChippa, abanye nguJames Okwuosa owadlala umdlalo owodwa kweZimnyama, Thamsanqa Sangweni osebuyiselwe kuyona iChilli Boys. Kwabasuke kwiPirates baya kwiChippa kukhona unozinti uBrighton Mhlongo oseyibamba kwiBidvest Wits noThabo Rakhale osezama inhlanhla eTurkey. Ngaphambi kokuqala kwesizini ka-2018/2019, iPirates ithathe kwiChippa uLinda Mntambo obekade esayine kuleli qembu maphakathi nesizini edlule esuka kwiJomo Cosmos, Abel Mabaso osebuya kwiMamelodi Sundowns ne-Ajax Cape Town noPaseka Mako.