Ubuthebelele ibhasi elisha elitoniwe iHyundai H1
KUZOMELE bashayelwe ihlombe kwaHyundai ngomsebenzi abawenzile bethuthukisa ibhasi labo eseliphenduke intandokazi iHyundai H1.
Phela kucacela wonke umuntu uma liqhamuka ukuthi alifani nhlobo namanye ngenxa yengaphambili lalo elihlukile. Amalambu alo ngaphambili ashintshile.
Ngizwe ezinye izinsizwa zikhuluma zodwa zincoma ubuhle balo kodwa zikuveza ukuthi alihlukile kakhulu kunelidala. Vele akusiyo imoto abayiqale phansi kodwa bathuthukise ekhona. Mina ngithanda ukuyibuka ngesayidi okuyilapho uphinde ubone khona umehluko wayo njengoba inamarimu amasha angu17 inch. Igoqene kahle futhi ayifani nendala engathi icijile kancane ngaphambili.
Ngaphakathi kugqame i-infotainment system kwitouchscreen enkulu. Yilapho ukwazi ukudlala khona umsakazo futhi uxhume iselula ngeBluetooth. Umsakazo nokubamba iselula ngeBluetooth ukwazi ukukulawula ngamabhathini asesiteringini. Isiteringi usuyakwazi ukusihlela ukuthi sime kanjani ngendlela wena ofuna ukusishayela ngayo. Uyasehlisa usinyuse ngokuthanda kwakho.
Njengoba kuyimoto enkulu nje, sebeyigaxe nekhamera eyenza impilo ibe lula uma uhlehla. Noma ngabe yikuphi lapho ngipaka khona bengivele ngize ngesinqa ngoma ingemuva livela esibukweni esiphezulu zokubuka ngemuva.
Okufike kube wubukhosi ngeH1 wukuvuleka kwayo ngaphakathi. Phela ilayisha abagibeli abayisishiyagalolunye. Ayikho into ebuhlungu uma nithatha uhambo bese nithi izingane azihambi, hhayi ngoba ningathandi ukuhamba nazo kodwa nicabangela isikhala.
I-H1 iyakuqeda konke lokho ngoba inesikhala esanele sabagibeli kanjalo nempahla. Isihlalo sangemuva siya phambili ukuze kuzokwanda isikhala sebhuthi. Injalo nje, ikwazi nokudonsa inqola enesisindo esingu-1 500 kg.
Ezinye izinto i-2.5 turbodiesel enazo zihlanganisa iBluetooth namabhathini esiteringini, cruise control, automatic air condtioner, glove box cooling, airbag eceleni, izibuko ezigoqeka ngogesi ne-electronic stability programme. I-Hyundai H1 2.5 Elite Bus inenjini engu-2.5 turbocharged kadizili enamandla angu-125 kW ne-torque engu-441 Nm. Ino-gearbox oyi-5speed ozishintshayo. Ukuba kwayo ne-torque enkulu kwenza amandla isheshe iwafake futhi ayinayo i-turbo lag. Emgwaqweni intofontofo futhi umshayeli uwubona kahle umgwaqo ngenxa yokuthi uhlalela phezulu. Ngebhadi ayivezi ukuthi idla udizili ongakanani ngebanga ngakho asikwazanga ukubona kodwa ngemuva kokuhamba u-284.4 km ibiveza ukuthi isengabamba u-266km.
Sengivele ngiqalile ukuyibona emgwaqweni okuyizinkoba zokuthi izoqhubeka nokuthandwa njengoba kudayiswe amaH1 angaphezulu kuka14 424 kusuka yethulwa ngo-2009. Inani H1 2.5 Elite Bus (turbodiesel, automatic transmission) R629 900
Inani lihlanganisa i-warranty yeminyaka emihlanu noma u-150 000km ne-powertrain warranty yeminyaka emibili noma u-50 000km, roadside assistance yeminyaka emihlanu noma u-150 000km ne-service plan yeminyaka emihlanu noma u-90 000km.