IGazoo ibheke ukwenza kahle emncintiswaneni weSACCS
IQEMBU iToyota Gazoo Racing SA libheke ukwenza kahle emqhudelwaneni i-2018 South African Cross-Country Series (SACCS) emjahweni i-Altas Copco 400, eBronkhorstspruit, ngaphandle kwasePitoli namhlanje nakusasa.
Umqhudelwano usuphakathi nendawo njengoba umjaho wangempelasonto kuzoba kungowesine.
Umengameli weqembu uGlyn Hall uthe zonke izimoto zabo zinecooling system yesimanje.
“Inhloso yethu wukuqeda kahle ngezimoto zombili,” kusho uHall.
UGiniel de Villiers nomqondisi (navigator) wakhe uDennis Murphy yibo abazihola phambili ngokwelogi futhi ngemuva kokunqoba umjaho iToyota Kalahari Botswana 1000 Desert Race, uDe Villiers usevule igebe esicongweni.
Yize uMurphy ejoyine uDe Villiers njengomqondisi emzuliswaneni wesibili, uye ozihola phambili kubaqondisi njengoba sekusele imizuliswano emithathu nje.
UHenk lategan nomqondisi wakhe uBarry White baba nosuku oluhle kwiDesert njengoba banqoba futhi bathola amaphuzu angu-30. ULategan usendaweni yesine kwilogi.
“UHenk noBarry benza kahle kakhulu eBotswana futhi sibadinga ukuthi baqhubeke lapho,” kusho uHall.
Kukhona nezinye izimoto zakwaToyota okukhona kuzo iToyota Hilux kaChris Visser noPhilip Herselman (Atlas Copco Toyota Hilux) esigabeni seClass FIA nesesigabeni seClass T ehamba uJohan noWerner Horn (Malalane Toyota Hilux) kanjalo nesesigabeni iClass S kaHeinie Strumpher noHenri Hugo (4x4 Mega World Toyota Hilux).
Umjaho uzoqala namhlanje ngo-2 emini. Kuzobe kuwumjaho wokungenela ozoba ngu-40k. Umjaho omkhulu uzoba kusasa ngo-8 ekuseni kanti uzosukela futhi uphelele eSoetdoring Function Venue. Izethameli zingena mahhala.