Ukhamba lufuze imbiza kuThando
UMAKHAYA “Mdingi Express” Ntini uthi unesicelo esisodwa endodaneni yakhe engumshwibi oza kahle emdlalweni wekhilikithi uyise aduma kakhulu kuwo.
UThando Ntini (18) ushaye into ecokeme eqenjini lesizwe labaneminyaka engaphansi kwewu-19 ngesikhathi livakashele e-England.
Sezikhona izinkulumo ezithi uThando ufuze uyise ngokudlala njengaye ncamashi.
UNtini (omdala) uthe akayivezeli indodana futhi akalivezeli izwe indlela ajabule ngayo ngenxa yokuthi indodana yakhe iandela ezinyathelweni zakhe.
Isizathu salokhu wukuthi uyesaba ukuthi uma engayivezela indlela azizwa ngayo ingagcina isizithwala. Njengokwejwayelekile baningi ababheke ukuthi uThando aqhubeke lapho kugcine khona uyise ukuze avuse isibongo sakubo.
UThando ube ngomunye wabadlali abagqamile eqenjini lesizwe ngesikhathi livakashele e-England. Phakathi kwemidlalo agqame kuyo kukhona lapho bethele induku kosokhaya bebashaya ngama-run awu-79, eRiverside. Uthando uthole amawikhethi amane kulo mdlalo.
“Angifuni neze ukumcindeza uThando. Isicelo nje sami kuyena sisodwa vo. Ngifisa ukuthi ngelinye ilanga adlale kumaProteas kuphela. Anginandaba namarekhodi kepha uma nje engagcina edlalele amaProteas lokho kuyongithokozisa kakhulu,” kusho uNtini owashiya kwelesizwe enamawikhethi angaphezulu kuka-300.
UNtini uthe kuyamthokozisa ukuthi indodana yakhe ayiqokwanga ngenxa yokuthi uyise ungubani noma ngenxa yesibongo sayo kodwa kungenxa yekhono eyaliphiwa wuMdali.
“Ngikubona kuyinhlanhla ukuthi nginendodana eyenza engangikwenza. Akukona nje ukuthi igcina icala kodwa ikwenza ngothando nangekhono enalo. Ngizama ngakho konke okusemandleni ukuthi ngingamphathisi okwendodana yami kodwa ngimphathise okwendoda ekwaziyo ukuzithathela izinqumo. Lokhu kuzosiza ngoba kuzothi uma eshibilika kube lula ukuthi afunde,” kuqhuba uNtini.
Njengoba eqhubeka ekhula uThando, kulindeleke ukuthi adlalele elinye lamaqembu amakhulu ngaphambi kokulibangisa phesheya kwezilwandle emiqhudelwaneni emikhulu. Lawo maqembu yiCape Cobras, Dolphins, Knights, Lions, Titans neWarriors.
“Anginandaba ukuthi udlalela liphi iqembu ngoba ekugcineni kuba yiwona akhethayo ukuthi afuna hlobo luni lomdlali. Okubalulekile kimina wukuthi kube yiqembu azojabula kulona ngoba akukho okudlula ukujabula. Angifisi neze ukuthi ayodlalela iqembu azofika kulo athwale kanzima ngoba ngeke akwazi ukudlala kahle,” kuphetha uNtini.