UMtukudzi uzonandisa kowabesifazane
ABANTU besifazane baseNingizimu Afrika bazokwetshisa usuku lwabo ngolozolo lomculo oluzobe luphakwa yingwazi yaseZimbabwe u-Oliver ‘Tuku’ Mtukudzi, eThe Warehouse eThekwini ngoLwesihlanu.
Umgqugquzeli walo mcimbi uMarlyn Ntsele uthe izithameli zizobuye zithole ithuba lokuzwa amanoni akwi-albhamu ka-67 kaMtukudzi okubalwa kuwo elisihloko sithi Hany’ Ga.
Nakuba ecula kakhulu ngolimi lwangakubo lwesiShona kodwa usezakhele udumo nakuleli ngezingoma eziningi ezishisa izikhotha okukhona kuzo ethi Todii nethi Neria.
Njengoba le nkakha inesikhungo eqeqesha kuso amaciko eZimbabwe futhi esibizwa ngePakare Paye Arts Centre, uMarlyn uthe uMtukudzi uzobe ephelezelwa yingxenye yamaciko abathwasiswe nguye.
“Uzobe ephelezelwa ngamazwi nguSamantha Mtukudzi noFiona Gwena. Kuma-drum uzobe ebophele uKeith Musena, uCharles Njekesa esigingcini sebhesi, uProsper Mashipe kuma-keyboards noRodney Roda esigingcini.”
Ngaphandle kweziqu zobudokotela ahlonishwe ngazo yizikhungo zemfundo ephakeme, uMtukudzi ubuye waklonyeliswa ngendondo yeThe International Council for African Womanism Award (ICAW), ngenxa yamagalelo akhe okuthuthukisa abesifazane ngomkhakha wezobuciko.
“Ngaleli zwi lakhe eliyisihosho, usenenqwaba yabalandeli e-Afrika jikelele nasemazweni angaphandle,” kusho uMarlyn.
Uthe njengoba uMtukudzi esezungeze wonke umhlaba, abantu mabalindele umcimbi oseqophelweni eliphezulu kakhulu.
“Abantu abenze isiqiniseko sokuthi bazozibonela bukhoma le ngqalabutho, endaweni enhle kakhulu, kunomoya omuhle nomculo omnandi,” kuphetha uMarlyn.
Kuzobe kungenwa ngamathikithi abiza uR250.
Amathikithi atholakala kumaComputicket.