UKHOZA UCHAZA NGOBUDLELWANE BAKHE NOCHIPPA
USIHLALO we-0rlando Pirates, u-Irvin Khoza ucacise ngobudlelwano anabo noweChippa United, uSiviwe “Chippa” Mpengesi abahwebelana naye ngabadlali.
Akusathusi ukubona abadlali bala maqembu bephambana. I-Chippa ibuyiselwe uThami Sangweni ngesizini edlule ojoyine eZimnyama kodwa wafike wakhuhla ibhentshi.
UNkosinathi Mthiyane ngomunye umdlali osebuyele kwezikaMpengesi ngemuva kokuhluleka wukugqama kwiPirates.
Baningi nabanye asebejike kuwona la maqembu. UMarc van Heerden noJames Okwousa nabo bayihambile le ndlela.
Ngesikhathi uKhoza ekhuluma kwiMarawa Sports Worldwide kuRadio 2000, uphendule umbuzo womlaleli ngobudlelwano babo.
“Lobu wubudlelwano obunenzuzo kuzona zombili izinhlangothi. Uma ngidinga abadlali, uChippa kuphela okwenza kube lula lokho, nami uma kunomdlali okhona ngiyamnikeza.
“Ngale kwalokho ungikhumbuza ngesikhathi ngisaqala kwezokuphatha ebholeni ngithenga igunya le-Alexander Blackpool. Ngabhekana nezinselelo kungekho ongesekayo. Ngicabanga ukuthi uChippa uyadinga ukwesekwa. Indlela yakhe iyafana nayami. Uma ngibuza ngomdlali akabalisi ngokuthi yena uzodliwa yizembe, uyavuma ukungisiza ngabadlali,” kusho uKhoza.
Ebuzwa ukuthi useke wameluleka yini uMpengesi ngokupheka ethulula abaqeqeshi uthe: “Leyo yindlela yokufunda. Kumele kwesinye isikhathi athi ukungena emlilweni. Ngokuhamba kwesikhathi uzokwazi ukuthi kunjani ukuhlala kwiPremier League.”
UPotshoza uyakhumbula ngesikhathi iChippa ikhushulelwa esigabeni esikhulu ukuthi uMpengesi akazange akufihle ukuthi ungumlandeli wokuqina weZimnyama.
NoPotshoza ngeke aliyeke ithuba lokuhlala emuhle eqhaweni lakhe uma engalithola lelo thuba. Angaliphathela ngisho isambulela namapotimende.