Kuvalwe amasonto kukhalwa ngabefundisi
ABEVALWE ngezingidi amasango amasonto amabandla amabili aKwaMashu izolo, bekhala ngabefundisi.
Izolo amaLuthela akhonza egatsheni laKwaMashu, eSangweni,elikwa-F, elidume ngokuthi yisonto loZalo ngenxa yokuthi umdlalo we-tv, Uzalo lusebenzisa leli sonto uma ludlala indawo yesonto, agcine ebamba umhlangano lapho kupakwa khona izimoto, isango lesonto likhiywe ngezingidi, ezintsha.
Esangweni bekunanyathiselwe amaphepha athi umfundisi (KB Maseko) onezinyanga ezintathu engalubhadi kuleli gatsha, uyalixova, futhi unabantu abathandayo nangabathandi.
Kuthiwa izinkinga ziqale kuleli gatsha ngesikhathi umfundisi nowakwakhe bekhombisa ukungaseseki isigungu esisha sokuphathwa kwesonto esikhethwe ngoMashi, ngoba kuphume abantu abefuna babuyele kulo mkhandlu behlulwa okhethweni.
Kuthiwa isigungu esisha sokuphathwa kwaleli gatsha esiholwa uNkk Nonhlanhla Khanyile asizange sinikwe ngokusemthethweni izintambo obekumele kwenziwe ngoMeyi.
Kuthiwa umkhandlu omdala bekumele ubikele ibandla ukuthi ushiye kukhona imali engakanani esikhwameni sebandla, uchaze wenzeni kule minyaka eyisithupha uphethe, uchaze nangezinkontileka zaleli bandla nabathile okubalwa neyoZalo, kodwa alizange likwenze lokho. UNkk Khanyile uvumile ukuthi leli gatsha linezinkinga, wathi umkhandlu awuholayo uhambise uhla lwezikhalo enhlokohhovisi, kodwa kwathiwa abayilandelanga imigomo yokufaka izikhalo.
“INamhlanje bekumele sibikele ibandla ukuthi sesihambe sagcina kuphi, sesifika kuvalwe amasango,” kusho yena.
USihlalo womkhandlu saseNtuzuma, igatsha laKwaMashu elingaphansi kwaso, uMnuz Thabani Mazibuko, uthe abanalo igunya lokungena bagxile edabeni oselwedluliselwe ezingeni elingaphezulu kwabo, njengoba selubikwe kumphathi wesifunda saseThekwini. Uthe udaba lokungeneliseki kwamanye amalungu ebandla lwadingidwa umkhandlu omusha ngoMeyi asibanga khona isisombululo base bethumela amaminithi alowo mhlangano kwisekethe (eThekwini).
Uthe bezwile ukuthi kube nokuphazamiseka kwenkonzo ekuseni, okuyinto ebashaqisile nabo.E-Apostolic Faith Mission, KwaC, KwaMashu ebuye yaziwe ngeMaranatha nakhona amalungu aleli bandla abegcwele ngaphandle, amasango ekhiywe yingxenye yamakholwa aleli bandla abebhikisha ethi umfundisi wawo akayindawo.
Abesho kanjena nje ngoba isifunda saleli bandla saseThekwini besizobikela amakholwa ukuthi umfundisi waleli gatsha uzogcina ezinyangeni ezimbili ngoba utholakale enamacala okwephula imithetho yebandla.
Abahambisana noPastor Simon Mdletshe bebethi uboshelwe amanqina enyathi wethweswa amacala osekuthiwa utholakale enecala kuwo.
Ngaphandle kwesango amakholwa abehlukene kabili amanye ethi akahambe, amanye ethi akayindawo.
UPastor Tyrone Goliath wesifunda saseThekwini uthe uMdletshe ubephenywa ngamacala yinhlokohhovisi, okukhona kuwo awokusebenzisa budlabha imali, ukuhlanganisa igatsha laKwaMashu nelaseNanda wakha igatsha elilodwa elaziwa ngeMaranatha engayitholanga imvume kwabamphethe.
Uqhube wathi uMdletshe wawavuma amacala ayebekwe wona. Kusukela izolo uthe leli gatsha lizolawulwa yisifunda, uma esehambile kuzolethwa umfundisi omusha. Lezi zindaba zimenyezelwe ngombhobho khona ngaphandle kwesonto.