Ithuba kubantu lokuphawula ngeVAT
UMPHAKATHI unikezwe kuze kube wukuphela kuka-Agasti ukuthi uphawule ngezimpahla okufanele ingakhokhwa kuzo iValue Added Tax (VAT).
NgoLwesihlanu ithimba ebeliphenya ngempahla okungafanele ikhokhwe kuzo intela liphakamise ukuthi isinkwa esimhlophe, umfaniswano wesikole, amaqakelo, namanabukeni ezingane nawabadala kungakhokhiswa iVAT.
Ithimba laqokwa wuNgqongqoshe wezeziMali, uMnuz Nhlanhla Nene, emuva kokuthi umphakathi ukhalile ngokunyuswa kweVAT isuka ku-14% iya ku-15%.
Kumanje abantu abayikhokhi intela uma bethenga impuphu, imifino, izithelo, irice, amafutha okupheka, ubhontshisi nokunye okudla okubalulekile.
Umbiko ushicelelwe kwi-website yezezimali ngoLwesihlanu. Ithimba ebeliphenya ngeVAT liveze ukuthi umfaniswano wesikole akufanele ubalwe nezimpahla ezijwayelekile.
“Siphakamisa ukuthi uMnyango wezeziMali uqinisekise ukuthi impahla esithi ayikhokhwa intela kuzo ifakwa ohlwini olukhethekile ukuze abezitolo bangathathi iVAT kuyo. Sifuna aqinisekise nokuthi abesifazane abampofu bathola amaqakelo mahhala, kuqinisekiswe ukuthi izingane zidla ukudla okunomsoco ezikoleni. Sifuna kunyuswe nemali yesibonelelo sezingane nempesheni ukuze abantu bakwazi ukubhekana nezindleko zempilo,” kusho isitatimende.
Isitatimende siphetha ngokugqugquzela umphakathi ukuthi uthumele iziphakamiso zawo zempahla okungafanele ukuthi ikhokhe iVAT ngokumela umyalezo kwi-email ethi vatsubmissions@treasury.gov.za
Kuthiwe ungqongqoshe uzobheka iziphakamiso zabantu, ezethimba leVAT bese eza nombiko ophelele wempahla ezokhokha iVAT.