Ushise izimpahla zomembeso womnakwabo

UQHUBEKE sekumuncu umcimbi womembeso eNgonyameni, eduze kwaseMlaza, izolo ngemuva kokushiswa kwezimpahla zomcimbi okuthiwa zishiswe yinkosikazi endala yendoda ebisimbesa ingoduso yesibili.

Phezu kokuba izimpahla eziningi zishile kwasala izingubo ezimbalwa kodwa umcimbi ugcine uqhubekile.

Inkosikazi endala kuthiwa ifike nemoto ebilethe izimpahla. Kuthe kusaphele isikhashana esincane izimpahla zehlisiwe, ibe isikhipha u-2 litha kaphethroli yabhunyela izimpahla yabe isizishisa.

Lokhu kuthiwa kwenzeke abantu abaningi bengakafiki emcimbini. Kuthiwa izingane ebezikhona zizamile ukukhuza kodwa inkosikazi endala yazidonsela isibhamu zabaleka.

Kuthiwa ithe ingashisa izimpahla yabe seyihamba.

Amaphoyisa afikile endaweni okwenzeke kuyo lokhu kodwa angabopha muntu ngoba icala belingavuliwe.

Umthombo weSolezwe uthe uyoyixolela amagwababa echobana into eyenzeke emcimbini.

“Besikade size emcimbini womembeso. Inkosikazi endala ifike yashisa zonke izimpahla ngoba ingafuni ukuthi indoda yayo ithathe inkosikazi yesibili,” kusho umthombo.

Uthe inkosikazi endala ifike nezimpahla kwaba sengathi nayo ize emcimbini.

Uthe basola ukuthi inkosikazi endala ibingafuni ukuthi umyeni wayo athathe inkosikazi yesibili.

“Owesilisa, ongumshumayeli ebandleni lakwaShembe, ubesefuna ukuganwa yinkosikazi yesibili ngoba ibandla lakhe liyamvumela,” kusho umthombo.

Okhulumela amaphoyisa KwaZulu-Natal, uLt Colonel Thembeka Mbele, uthe amaphoyisa abikelwe ngokwenzekile.

“Amaphoyisa ayile endaweni yesigameko ngemuva kokulunywa indlebe kodwa abuye azihambela ngoba alikho icala ebelisavuliwe,” kusho uMbele.

Imizamo yokuthola abaqondene nodaba ayizange iphumelele izolo ngenxa yesiphithiphithi ebesidalwa wukuba khona komcimbi.