Lingaphandle iphoyisa ‘elibulale’ owakubo
ALIKABOSHWA namanje iphoyisa elisebenza ophikweni olulwa nothuthuva emphakathini laseMlaza, okuthiwa lidubule umfowabo washona ngemuva kwengxabano ngoMgqibelo.
Leli phoyisa elingeke lidalulwe okwamanje kuthiwa lixabane nomfowabo omdala, okuthiwa ubephethe ummese lavele lamngqokoza ngenhlamvu.
Kuthiwa lizamile ukuphuthumisa umfowabo, uMnuz Linda Nene esibhedlela ePrince Mshiyeni eMlaza kodwa ngebhadi washona.
Umthombo weSolezwe oyiphoyisa elingagunyaziwe ukukhuluma nabezindaba uthe bathole ukuthi kube nengxabano yomndeni phakathi kwalezi zelamani, okuholele ekutheni kuphume isidumbu.
“Asazi ngempela ukuthi bekubangwani kodwa sithole ukuthi kube nokuxabana phakathi kwalezi zinsizwa zandawonye, lona ongesilo iphoyisa ephethe ummese, iphoyisa labe selimdubula.
Yilona futhi elimphuthumise esibhedlela ngemuva kokumdubula umfowabo,” kusho umthombo.
Uqhube wathi iphoyisa belingakaboshwa ngemuva kokudubula umfowabo.
“Amaphoyisa abefuna aboshwe umsolwa kodwa uphiko oluphenya amacala enziwe amaphoyisa, i-Independent Police Investigative Directorate (Ipid), lwathi akangaboshwa akulindwe isinqumo soMqondisi wabaShushisi,” kusho umthombo.
Okhulumela amaphoyisa KwaZulu-Natal, uLt Colonel Thembeka Mbele uthe ucela kuthintwe abe-Ipid okuyibo abaphenya ngalolu daba.
Umphenyi wakwa-Ipid okhulume neSolezwe kodwa ongagunyaziwe ukuthi akhulume nabezindaba ukuqinisekisile ukuthi yibona abaphenya lolu daba.
“Uphenyo lwaleli cala okhuluma ngalo luyaqhubeka. Okwamanje bekungakaboshwa muntu,” kusho umphenyi.
Imizamo yokuthola uMnuz Moses Dlamini okhulumela i-Ipid kuzwelonke ayizange iphumelele izolo. Ucingo lwakhe beluvaliwe kanti nemiyalezo athunyelwe yona kuze kwashaya isikhathi sokushicilela engayiphendulile.