Amaphutha ngeBEE awasho ukuthi kumele iphele
IQEMBU eliphikisayo eNingizimu Afrika, iDA, seliphumele obala lathi lifisa kuphele ngohlelo lokufukula osomabhizinisi abamnyama, i-Broadbased Black Economic Empowerment (BEE).
I-DA ithi ifisa ukuphakamisa olunye uhlelo olungangena endaweni yeBEE ngoba lolu olukhona njengamanje aluthuthukisi wonke umuntu kunalokho kuhlomula idlanzana elisondelene nenhlangano ebusayo, i-ANC.
Leli qembu eliphikisayo lithi iBEE ayisizi ngalutho ekulweni nobubha. Lithi kungcono kubhekwe ezinye izindlela okungasizwa ngazo abantu abaningi njengokuthi abantu abanejoka lokondla abantu asebebadala baphulelwe intela abayikhokhayo.
I-BEE yasungulwa ngo-2003 njengenye yemizamo yokufukula nokulekelela abantu abamnyama ukuthi babambe iqhaza kuwo wonke amazinga omnotho kwazise ngesikhathi sobandlululo babevaleleke ngaphandle.
Kunenqwaba yabantu abamnyama namhlanje esithole amathuba okwakha umnotho, ukuthenga amasheya ezinkampanini okubalwa nezikwiJSE ebingeke ikwazi ukukwenza lokhu ukube ubungekho lo mthetho.
Ngisho abantukazana abangenamali etheni bayakwazi ukuba nengxenye yamasheya uma kudayiswa amasheya ngesaphulelo ezinkampani ezifana noMTN, Sasol noMultichoice ukubala nje ezimbalwa.
Kunosomabhizinisi abalekelela ngemifundaze nangezinye izinto emphakathini ngenxa yomcebo abawakhe ngeBEE.
Kukhona abantu abamnyama asebehlala kumabhodi ezinkampani abathola ulwazi oluthe thuthu ngokuphathwa kwamabhizinisi obekungeke kwenzeke ngaphandle kweBEE.
Kunabantu besifazane abenza ezibukwayo kwezamabhizinisi, into ebingeke yenzeke ukube lo mthetho awusizanga ukubavulela iminyango.
Yebo, njengayo yonke into, zikhona izinto ezidinga ukuphuculwa ngeBEE ukuze sande isibalo sabantu abahlomulayo kuyona.
Kodwa kumqoka ukuthi kukhunjulwe ukuthi iBEE akuwona kuphela umthetho okhona wokufukula abantu abamnyama nokulwa nobubha, ungeminye yemithetho ebekiwe.
I-BEE inelalo iqhaza elidlalayo. Amaphutha ayo awasho ukuthi kumele iphele, kudingeka alungiswe.