Ukhiphe engenaye umdidiyeli
UKUSEBENZA ngaphandle komdidiyeli wakhe uRobbie Malinga, uthe kumkhulisile ekubeni yiciko uMusa Sukwene okhiphe i-albhamu entsha ngoLwesihlanu.
UMusa ukhiphe i-albhamu enezingoma ezingu-12 ayiqambe ngegama lakhe.
Lo mculi owazakhela udumo ngokunqoba emncintiswaneni womculo ama-Idols ngo-2013, kuma-albhamu akhe adlule ubesebenza noRobbie oshone ngoKhisimusi wonyaka odlule.
“Bekunzima ukusebenza ngaphandle kukaRobbie. Lokho kodwa kuhambe kwangibonisa ukukhula kwami ngisuka ekubeni wumculi ngiba wumdidiyeli,” kusho uMusa.
Uthe abanye abadidiyeli asebenze nabo nguNtsika weThe Soil, Musa Mashiyane noDr Tumi Lawrence Matshiza.
Kule albhamu uMusa ufake nezinkondlo zikaSbo Da Poet, Toza Buthelezi noPuno Selesha. Abanye abapikile nguKhanyo Maphumulo noTshepo Tshola.
“Izimbongi ngabantu abaxoxa izindaba. Ngokusebenza nabo bengifuna ukukhombisa abantu ubuciko bazo ngoba bayazikhohlwa,” kuchaza uMusa.
NgoLwesihlanu lo mculi uyethule bukhoma i-albhamu yakhe endaweni uyobumnandi, eViews at Twenty5, eThekwini.
Abantu abebekhona bebehleli phambi kwesiteji, uMusa wathi uyathanda ukucula endaweni enjalo ngoba abantu ubabona kahle bonke.
Uqale ngengoma yakhe endala ethi Angisakwazi nethi Nomkhitha ngaphambi kokushaya ezintsha, okubalwa kuzo iNgivumele neMad In Love.
Uthe eseshaya ethi Makoti abantu bakhombisa ukuyithakasela ngoba basukume bonke badansa futhi kwezwakala amakhwela nemikikizo.
Uvale ngapike kuyo uRobbie ethi Mthande abantu bacela impinda.
Uyiphinde esehambisana nebhendi enandisa ngaphambi kwakhe iDeep Breath.