Uhambe phambili kwelokudayisa emgwaqweni
OWESIFAZANE waseMtshezi, uNksz Nokulunga Valentia Mbanjwa ubaqwaqwade bonke abadayisi basemgwaqweni emcimbini wokugqokiswa kwamajazi emfundo ephakame obuseGarden Court, eSouth Beach eThekwini ngoLwesihlanu. UNksz Mbanjwa (21), obephothula izifundo zeNew Venture Creation e-Egsibit Training, uklonyeliswe ngendondo yeBest Performing Student.
Le ntokazi, egobe amadlangala eReservoir Hills, eThekwini, ithe yona idayisa emgwaqweni waseThekwini uMansel. “Ngifunde lukhulu ngokuphathwa kwebhizinisi ngendlela nokuthi imali yongiwa kanjani ukuze kusimame ibhizinisi lakho,” kusho uNksz Mbanjwa owaphothula uGrade 12 eMtshezi High ngo-2014. Usihlalo wekomiti lomnyango obhekene nokuthuthukiswa kwamabhizinisi kuzwelonke, uNksz Ruth Bhengu, ukhuthaze abadayisi ukuba bagxile kakhulu emkhakheni wezobuchwepheshe bamanje.
“Njengamanje sesikwi-4th Industrial Revolution. Kufanele sihambisane nesimo samanje, sifunde ukufaka ama-oda ngezobuchwepheshe. Sekufanele namabhange ayeke ukunikeza osomabhizinisi ulwazi oseludlulelwe yisikhathi. Ayababulala osomabhizinisi,” kusho uNksz Bhengu. Uthe izinto eziningi sekufanele zenziwe ngekhompuytha. Okhulumele i-Egsibit Training, uMnuz Mthokozisi Shange, uthe bebethwesa iziqu abadayisi basemgwaqweni abagxile ezimpahleni zangaphansi zakwaJockey.
“Besibachushisa ngokuthi bangalisimamisa kanjani ibhizinisi. Sathola ukuthi leli bhizinisi loku-odwa kwezimpahla zakwaJockey selisabalale kakhulu ngisho naseLesotho. Abadayisi babe sebehlangana benza inhlangano, iTexCon Hawkers Forum, ukuze bakwazi uku-oda ngokuhlanganyela ukuze bathole isaphulelo.
Yize sithole ukuthi banekhono lokudayisa kodwa bebeshoda ngekhono lokuliphatha,” kuphetha uShange. Kuzwakale umikikizo namakhwela sebethwesa imiyezane abadayisi. Umcimbi ubuhanjelwe yizicukuthwane eziqhamuka ezinhlakeni ezehlukene.