Angikacabangi ngokuvikela isicoco seMTN 8: Tembo
AKAKACABANGI ngeyokuvikela isicoco seMTN 8 umqeqeshi weSuperSport United, uKaitano Tembo, iqembu lakhe elidlulele kowandulela owamanqamu ngemuva kokushaya i-Orlando Pirates ngempelasonto.
EzikaTembo, onikezwe isikhundla ngokugcwele ngesonto eledlule, ziguqise iBucs ngo 4-3 kumaphenathi.
Umdlalo wama-quarterfinal obuse-Orlando Stadium ngoMgqibelo ebusuku uphele ngo 2-2. Ayibanga khona egoba uphondo esikhathini esengeziwe.
Amagoli Amatsatsantsa a Pitori ashaywe ngukaputeni uDean Furman noMatthew Rusike. AweZimnyama avalelwe phakathi u-Augustine Mulenga noGladwin Shitolo.
“Ngicabanga okusemqoka wukubhekana nomdlalo ngamunye, singabheki phambili kakhulu,” uphendule kanje uTembo uma ebuzwa ukuthi ngabe useyazibona yini bevikela isicoco ngemuva kokudlula kwiPirates.
Emdlalweni wakhe wokuqala njengomqeqeshi bahlulwe yiCape Town City ngo 2-0 kwi-Absa Premiership. Ngemuva kwalokho babuye bashaya AmaZulu FC ngo 1-0 njengoba sebephinde bedlula kwiPirates.
“Okungijabulisayo wukubona iqembu liya ngokukhula umdlalo nomdlalo. Njengamanje sesibe nemidlalo emithathu ezinsukwini ezisiyikhombisa okusho ukuthi kubalulekile nokunakekela abadlali ngendlela ukuze bangalimali,” kusho uTembo.
Uthe kungalesi sizathu u-Aubrey Modiba ehlale ebhentshini kowePirates.
UModiba nguyena oshaye into ecokeme kwi-United ngesizini edlule eba ngumdlali ovelele.
Mayelana nomdlalo uTembo uncome abadlali bakhe ngokulandela abebekuhlelile yize iPirates ibiwuphethe umdlalo.
“Bekungesiwona umdlalo olula ngoba besibhekene neqembu eliligcinayo ibhola. Besazi ukuthi kuzomele sisebenze kanzima thina singaliphethe bese sizama ukubabamba ngejubane ngoba sinabo abadlali abanesivinini, okuyiyona indlela esithole ngayo amagoli ethu.”
UTembo, obesebe yiphini labaqeqeshi kwi-United iminyaka, uthe akanalo uvalo ngokuthi usezohlala ngokusemthethweni kulesi sigqiki esishisayo.
Ngesizini edlule ubambile ngemuva kokusula kuka-Eric Tinkler ephikwa yimiphumela.
“Anginavalo. Bese ngibambe izinyanga eziyisikhombisa. Umsebenzi wokulungiselela isizini wenziwe yimina, ngakho akukho okusha engingathi ngiyakuqala. Izinsuku eziyisikhombisa ezedlule bezinzima ngenxa yemidlalo emithathu esibe nayo kodwa manje kungcono ngoba sizoba nazo izinsuku zokulungiselela umdlalo wethu olandelayo,” kusho uTembo.
Kulo mdlalo bazovakashela iBidvest Wits eBidvest Stadium ngoMgqibelo ngo-8.15 ebusuku.