UFadlu akafuni afakwe ingcindezi ambolekwe yiDowns
UMQEQESHI weMaritzburg United uFadlu Davids akafuni ukuthi wonke amathemba ezakhe abekwe esilomweni abasibolekwe iMamelodi Sundowns, esibonakala singena khaxa esitayeleni seTeam of Choice.
ITeam of Choice ihlabane ngesikhwishikhwishi samaBrazilians uKeletso Makgalwa, esibolekise kuleli qembu isizini yonke. Ngeledlule uMakgalwa ubingelele abalandeli beMaritzburg ngesikhathi eshaya umthobanhliziyo wegoli bethelwa othulini iFree State Stars ngo 2-1 emdlalweni we-Absa Premiership eGoble Park.
UMakgalwa ubonakala engena khaxa esitayeleni seTeam of Choice njengoba inebhola elisheshayo elidle ngomjiko oya phambili. Okunye okubonakala kuzokwenza uMakgalwa ezizwe esekhaya eMphithi, ukuthi iningi labadlali beTeam of Choice basebancane njengaye.
Nakuba ukufika kwalesi sibabuli kumnikeza ithemba uDavids kodwa uthe: “Angithandi ukuthi simfakele ingcindezi uMakgalwa. Ngiyavuma ukuthi ungumdlali osezingeni eliphezulu futhi okubalulekile ukuthi nathi kwiMaritzburg simnike ithuba. Usadinga ukuqeqeshwa nokunakekelwa ngendlela efanele ukuze ezofika lapho efuna khona. Akufanele sibeke wonke amathemba ethu kuyena kodwa kusafanele simnike ithuba lokuthi adlule kuzo zonke lezi zigaba esengizibalile,” kuchaza uDavids.
Eqhuba uDavids, uthe akakuphiki ukuthi uMakgalwa uwuhlobo lomdlali odlala isitayela sebhola seTeam of Choice kodwa kusafanele anikwe isikhathi.
“Simsayine simazi ukuthi unekhono eliyisimanga. Sithe uma silahlekelwa uMaboe (Lebohang), sabona kuwuyena ozosivala isikhala sakhe. Kodwa kusafanele ukuthi abekezelelwe, anikwe isikhathi,” kuqhuba lo mqeqeshi.
Ngaphambi kokuthi kuqale isizini, iMaritzburg ilahlekelwe abadlali abamqoka esingabala kubona uMaboe, Evans Rusike noBevan Fransman. UDavids uthe uyazi ukuthi abalandeli beMaritzburg bayazibuza bayaziphendula ukuthi ngabe lezi zikhala zizovalwa nini.
“Usihlalo weqembu uFarook Kadodia akabuthi quthu ubuthongo njengoba esebenza kanzima ukuzama ukuthola abadlali abazovala lezi zikhala. Asifuni abalandeli bacabange ukuthi sizibile, noma siyishaya indiva eyokuvalwa kwalezi zikhala. Sizozivala iwindi lingakavaleki. Sifuna ukuthi sibhekisise kahle ngoba asifuni ukuthatha nje noma ngabe yimuphi umdlali, sifuna ukuthola abafanele iqembu lethu,” kucacisa uDavids.
NgoMgqibelo iMaritzburg imemezele ukuthi isisayinise uJustice Figareido obedlala kwiManzini Sundowns yaseSwaziland. Lo mdlali usayine inkontileka yeminyaka emibili neTeam of Choice.