Uzosebenzisa i-United njengesango lokungena kwiBafana
UBONA iSupersport United izomsiza abuyele eqenjini lesizwe iBafana Bafana uPhumlani Ntshangase, osayine inkontileka yonyaka yokubolekiswa kwiSuperSport United esuka kwiBidvest Wits.
UNtshangase odlala ezindaweni ezihlukene enkundleni, njengoba ekwazi ukuyibamba ophikweni lwesokudla emuva, nasenkabeni yesisu, uthe isifiso sakhe esikhulu ukuthi athole ithuba lokudlala kwiSuperSport athi uma elithola uzokwazi ukudlalela iBafana Bafana maduze.
Le nsizwa yaseMlaza eke yalunguza kwiBafana Bafana ngesikhathi idlala kwiCosafa Cup ngo-2016, ibisilizwa ngendaba ijezi kuGavin Hunt njengoba ngesizini edlule ikwaze ukudlala kuphela imidlalo ewu-13 futhi ibengayiqali yonke.
“Ngike ngadlala eqenjini lesizwe lika-Under 23 kuma-Olympic eminyakeni edlule. Ngaleso sikhathi bengilithola ijezi kwiWits kodwa kuthe sengingasalitholi ngangabe ngisabizwa kwelesizwe. Engikufisa kakhulu lapha kwiSuperSport United ukuthola ithuba lokudlala, ukuze ngizobuyela eqenjini lesizwe. Ngiyazi kulokhu kuzobe sekuyiBafana Bafana ngoba sengineminyaka ewu-23,” kuchaza uNtshangase, obumuzwa ngisho emoyeni ukuthi weneme ngokusayina kwiSuperSport.
Ngesikhathi Amatsatsantsa eshukana ne-Orlando Pirates kumaquarter-final eMTN 8 ngoMgqibelo ebusuku, uNtshangase akazange adlale. Nokho uthe lokho kungenxa yokuthi ufike ekhempini sebevele bewulungiselele umdlalo, athi maduze uzobe esekulungele ukudlala.
“Umqeqeshi weqembu uKaitabo Tembo uyena obengifuna, wase ebambisana nabaphathi beqembu ukuthi ngigcine ngifikile kwiSuperSport.
Ngesikhathi ngifika sibe nengxoxo naye (uTembo) wangitshela ukuthi kade ayengifuna. Uveze ukuthi unesikwati esincane washo nokusho ukuthi ngizoba wusizo olukhulu njengoba ngikwazi ukudlala ezindaweni eziningi enkundleni,” kuqhuba uNtshangase.
Selokhu efike ebholeni elikhokhelayo uNtshangase usagijimele iWits kuphela. Ukubolekisa kwakhe kwiSuperSport uthe kuzobe kungokokuqala ngqa eqeqeshwa ngomunye umqeqeshi ngaphandle kukaHunt.
“Ngibona ngizofunda lukhulu komunye umqeqeshi nakwabanye abadlali engizobanga nabo ijezi. Angikaze ngiqeqeshwe omunye umqeqeshi esigabeni esiphezulu ngaphandle kukaHunt, konke lokho ngikubona kuzongenza umdlalli ongcono kakhulu futhi kuzongicija ekumelaneni nezimo ezahlukene,” kuphetha uNtshangase.