Inkombane ngabasebenzi abagula umlibe
KUNOKUKHATHAZEKA ngesibalo sabasebenzi bezempilo asebehlale emakhaya umlibe, kuthiwa abekho esimeni esihle sezempilo.
Kuthiwa balinganiselwa ku-85 abahleli emakhaya ngoba bengaphilanga.
Lokhu kusezimpendulweni zoMnyango wezeMpilo KwaZulu-Natal emuva kokubuzwa yiDA.
Kukholakala ukuthi sebehlale izinsuku ezingu-5 007 ezinyangeni ezinhlanu ngoba beselivini.
Umnyango uthi balinganiselwa ku-79 abahleli emakhaya ngoba kuthiwa abakwazi ukusebenza okwesikhashana, sebehlale izinsuku ezingu-4 107. Kunabayisithupha okungacaci ukuthi bangabuyela nini emsebenzini. Laba kuthiwa bakhokhelwa imali elinganiselwa kuR2 million behlangene.
Ezinye zezibhedlela ezibalwe kule nkinga iPrince Mshiyeni Memorial, enabayisishiyagalolunye abahleli izinsuku ezingu-496 behlanganisiwe, iMadadeni Regional enabayisikhombisa osekuphele izinsuku ezingu-395 neKing Edward enabahlanu asebehlale izinsuku ezingu-301.
Okhulumela iDA kwezempilo,uDkt Imran Keeka uthe bakhathazekile ngokuhlala kwabasebenzi isikhathi eside ngoba kuthiwa baselivini yokungaphili, ikakhulu ezibhedlela ezivame ukuba nomthamo omkhulu weziguli.
“Ukungabi bikho komsebenzi oyedwa kulezi zibhedlela kuholela ekutheni kube nomsebenzi omningi ogcina wenziwa abasebenzi abambalwa, okungaholela ekwenzeni amaphutha azoletha amacala,” kusho uDkt Keeka.
UNobhala wenyunyana yabahlengikazi, iDemocratic Nursing Organisation of South Africa (Denosa), uMnuz Mandla Shabangu uthe umnyango wona ngokusebenzisa abahlaziyi abalandelela ngokugula kwabasebenzi, iThandile Health Risk Management. Uthe abasebenzi baletha izincwadi zokugula ezivela kodokotela babo besho ukuthi abahlale isikhathi esingakanani bese iThandile ikuphikisa lokhu ngaphandle kokumhlola osuke egula. Uthe abasebenzi baphoqwa ukuthi babuyele emsebenzini bengakalulami, bagcine behlaliswe emakhaya ngoba bengekho esimeni esihle sempilo.
UNksz Ncumisa Mafunda, okhulumela uMnyango wezeMpilo uthe okushiwo ngezinsuku ezihlalwe abasebenzi kwenziwa kubonakale kukubi kakhulu kunokuyikhona.
Uthe sebebe nemihlangano eminingi bexoxa ngenkinga yokuhlaliswa kwenqwaba yabasebenzi emakhaya. “Ngenxa yalokhu sekulandelwa imibandela eminingi uma umsebenzi edinga ukuhlaliswa ekhaya ngoba engaphathekile. Umnyango uthathe isinqumo sokunika impesheni yokugula abangasakwazi ukusebenza kunokuthi baqhubeke bahlale ekhaya bebe behola,” kusho uNksz Mafunda.