‘IPhalamende aliqoke uMqondisi wezokuShushisa’
I-IFP neDA bacele uMengameli Cyril Ramaphosa ukuthi angabi sethimbeni elizoqoka uMqondisi wezokuShushiswa koMphakathi omusha. Kunalokho akanike iPhalamende ithuba lokwenza lo msebenzi.
Amaqembu aphikisayo asho lokhu emuva kokuthi iNkantolo yoMthethosisekelo inqume ukuthi u-Adv Shaun Abrahams kufanele ashenxe esikhundleni ngoba vele wayeqokwe ngokungemthetho.
“Uma iPhalamende kuyilo elizoqoka uMqondisi omusha wezokuShushiswa koMphakathi kusho ukuthi ngeke kube nokugxambukela kwenhlangano eyodwa futhi wonke umuntu uzobe ebuka okwenzekayo. Kufanele kulandelwe uhlelo olufanayo nalolo olulandelwa uma kuzoqokwa uMvikeli woMphakathi neKhomishini elwela amaLungelo Abantu,” kusho uMnuz Narend Singh we-IFP.
U-Adv Glynis Breytenbach weDA uthe uRamaphosa kufanele adedele iPhalamende liqoke ozongena kulesi sikhundla.
“Sifuna uMshushisi woMphakathi ongeke abe nokwenzelela futhi ozobuyisa ithemba kubantu,” kusho u-Adv Breytenbach.
UMnuz Pule Mabe, okhulumela i-ANC, uthe isinqumo senkantolo sinika uRamaphosa isikhathi esanele sokuthi alungise ubuholi bezokushushisa.
“Okubalulekile kwi-ANC wukuthi kubuyiswe uzinzo nesithunzi futhi kulandelwe nomthetho ophikweni lwezokushushisa. Siyabuthemba ubuholi bukaRamaphosa ngoba siyazi buzokwenza konke okufanelekile ukubuyisa ithemba kwezokushushisa,” kusho uMabe.
UDkt Mbuyiseni Ndlozi we-EFF uthe bayathemba ukuthi uRamaphosa ngeke avume ukutshelwa yi-ANC ukuthi enzeni kodwa uzolandela lokho okulindelwe ngabantu baseNingizimu Afrika.
USihlalo wekomidi lezoBulungiswa ePhalamende, UDkt Mathole Motshekga, uthe uyajabula ukuthi sekuzophela ukuxokozela ophikweni lwezobulungiswa ngoba sekufanele kubuye uzinzo.