Kuyathusa okwenziwa yizingane muva nje
MHLELI: Ziyamangalisa izinto esizifunda ephepheni kulezi zinsuku. Ubani owayazi ukuthi ngisho izingane ezifunda uGrade 2, zingadlwengula enye ingane. Kunzima kulo mhlaba esiphila kuwo. Konakelephi? Izingane ezincane kangaka kuyasho ukuthi kukhona lapho zabona khona kwenziwa, zabona ukuthi wumdlalo lona. Kuyethusa kakhulu futhi akukholeki.
Esikhathini esiningi kuye kwalulekwe izingane zamantombazane, silibale ngabafana. Ezabafana azelulekwa muntu, ziye zizibonele zona ukuthi zenze njani. Ukube kuya ngami ngabe kubizwe imbizo yabesilisa bodwa bayalwe futhi bafundiswe ukuthi kulo mhlaba siphila ngokuhloniphana nangokwazisana. Kulesi sikhathi samanje abafana abakwazi ngisho ukweshela intombi. Umfana usemane acele inombolo yocingo yentombazane bese ebona ukuthi uyathandwa. Nethelevishini isiyazisiza izishimane, sezimane zicele usizo khona (Uyangithanda Na?). Kwakumnandi ngaleziya zinsuku lapho ungumfana wakwenu, uphume kini uyoshela intombi yakozibanibani, lapho nizoke niphendulane kube sengathi iyakuzonda ingane yabantu kanti ifuna ukubona ukuthi uyayazi yini le nto oyikhulumayo. Lafa elihle kakhulu. Asisukume singabazali siluleke, sifundise izingane inhlonipho. Ngikhule ubaba wami ehlale engikhumbuza ukuthi uma ngithatha umakoti, yiziphi izibongo engihlobene nazo nokuthi ngiziphathe kanjani emhlabeni.
Wabe engeluleka ukuze kungathi sekufanele ngiganwe ngithathe isihlobo sami. Iziyalo eziningi ayengeluleka ngazo ngazithatha. Angizisoli namhlanje. Ngiyambonga yize engasekho ngoba wayikhathula indawo yakhe empilweni yami. Kanjalo nathi emindenini yethu kufanele izingane sizifundise, ikakhulukazi ezabafana ngoba yizo ezenza izinto ezesabekayo. Yebo, kuyenzeka izingane zisiphunyuke, ingane ifune ukuziphatha bese iyakhohlwa ukuthi umhlaba uyahlaba uhlaba abawuchwenselayo. Kepha kufanele sizinuke thina bazali, izingane ziyathanda ukwenza izinto ezisibone sizenza thina bantu abadala. Abanye bethu baye benze izinto kukhona izingane, bese ziyabukela. Asiqiniseke singabazali ukufundisa izingane zethu zabafana ukuziphatha okuyikho nenhlonipho, zibahloniphe abantu besifazane. Uke ucabange sesiphila sodwa kulo mhlaba singabantu besilisa bodwa? Impilo ingaba muncu, kusho ukuthi kukhona okushodayo. Abantu besifazane bayizimbali zomhlaba. Asikho isidingo sokusiphula okutshaliweyo uNkulunkulu. Bonginkosi Grey Phungula