Uncoma amava kaKomphela umdlali
UZIMISELE ngokukhohlwa konke okungekuhle osekwenzekile kuyena kusukela efikile ebholeni elikhokhelayo uMenzi Masuku, oveze ukuthi useyabona lapho eya khona manje ngoba usenomqeqeshi omphathisa okwendoda, hhayi umfana omncane onethalente njengoba bekwenzeka emaqenjini asedlule kuwona.
UMasuku odabuka KwaMashu uthe yena uyazethemba futhi uyayazi into angayenza enkundleni kodwa esikhathini esedlule ukushesha kwempumelelo yakhe kumenze wazithola esenkingeni. Ukhushulelwe esikimini esikhulu se-Orlando Pirates ngesizini ka-2014/2015, wabingelela ngenguzunga yegoli ayishaye bedlala neCeltic. Lelo goli liqokwe njengelivelele kwisizini ka-2014/2015.
Akagcinanga lapho uMasuku kepha usize iqembu laseNingizimu Afrika labaneminyaka engaphansi kwewu-23 lalala isithathu kweyeCAF Youth Championship ngo-2015. Umklomelo walokhu kube yindawo kweyama-Olympic ka-2016 eRio de Janeiro eBrazi, lapho ebekhona futhi uMasuku.
Ngemuva kokubuya eBrazil ziqalile zahlehla izinto yize ebebizwa nakwiBafana Bafana ebidlala kwiCosafa Cup kodwa ugcine edayiswa ngendlela engaqondakali kwiChippa United. Uhlale isikhathi esicela eminyakeni emibili ePort Elizabeth njengoba esesayine kwiCeltic ngoJanuwari nyakenye.
Ngeledlule ungene neminyakazo ebonakalayo iqembu lakhe lizitika ngeLamontville Golden Arrows koweligi ePrincess Magogo.
Ekhuluma neSolezwe ngemuva kwalo mdlalo uzwakalise injabulo yakhe ngokusebenza noSteve Komphela amchaze njengomqeqeshi ayekade emdinga empilweni yakhe.
Lo mdlali ubona ukuthi ukushesha kwezinto efika ebholeni elikhulu kwenze abanye abaqeqeshi bakhohlwa ukuthi usadinga ukuphekwa njengabanye abadlali abalingana naye.
“Kungibulele ukugqama nokushesha kwezinto ngoba kwenze abaqeqeshi okumele bangikhulise ngendlela bazitshela ukuthi sengiqinile. Uma umqeqeshi enza lokho nawe njengomuntu uyaqala ukukholwe lokho kanti uyazikhohlisa. Ngizokhula manje lokho angikungabazi. Ngisebenza nomqeqeshi ohluke kakhulu kunalaba ebengisebenza nabo eminyakeni edlule.
“UKomphela uyazinika isikhathi ahlale nami phansi angibonise lapho ngingenzi kahle khona bese engikhuthaza engitshela futhi okufanele ngikwenze kumbe ngikhuphule amasokisi kukona ukuze ngizoqala imidlalo,” kusho uMasuku. Ebuzwa ukuthi yini ayibhekile kule sizini uthe, “Ngibheke ukubamba isitayela sikaKomphela kuqala. Kuhle ngoba ukhuluma nathi ngobodwana sonke ngakho-ke ngeke kube nzima ukwazi ukuthi yini edingekayo. Usengitshelile ukuthi ithalente enginalo alitholkali kalula kodwa kumele ngizijwayeze ukumaka kakhulu. “Uyangikhuthaza futhi ukuthi ngizikhandle ejimini ngoba indlela afuna kudlalwe ngayo iyakudinga lokho. Ngibulawe ukuthi abaqeqeshi ebengidlala kubona ngokudlule bebezibonela umdlali osephelele kanti ngisadinga ukukhula ebholeni elikhokhelayo.”