Usebheke ikhefu oweMaritzburg
UFADLU Davids ongumqeqeshi weMaritzburg United, uthi uselinde kudlule umdlalo wezakhe neKaizer Chiefs ngoLwesihlanu, ukuze bezothola ikhefu elibalulekile lenyanga yonke, bazolungisa izinto eqenjini lakhe elibonakala libhedelwa yizinto selokhu kuqale isizini.
ITeam of Choice izotholana phezulu neChiefs emdlalweni we-Absa Premiership ngoLwesihlanu, eHarry Gwala Stadium ngo-8 ebusuku. Ziya kulo mdlalo nje, iMaritzburg ayikanqobi nowodwa umdlalo selokhu kuqale isizini njengoba ivule ngesibhaxu sika 2-0 ishaywa iLamontville Golden Arrows, yaphinde yathelwa othulini iFree State Stars ngo 2-1 (yomibili le midlalo eyeligi). Ivale ngokushaywa iCape Town City ngo 1-0 kuma-quarter-final kwiMTN 8. “Sizoba nekhefu lenyanga ngemuva komdlalo wethu neChiefs. Lokho kuzosinika ithuba lokuba kululame uBrian Onyango noNazeer Allie abadlala emuva ithuba lokululama ngokwanele. Silahlekelwe kakhulu ngokuhamba kukaFransman (Bevan) emuva, amagoli asingenelayo amaphutha angatheni okufanele engabe siyawagwema. Amaningi awo angena ngamakhona,” kusho uDavids. Nakuba sekuphele imidlalo emithathu iTeam of Choice inganqobi, uDavids uthe akumethusi nakancane lokho.
“Ngesizini edlule siyinqobe yomithathu imidlalo yokuqala esayidlala. Kodwa ngemuva kwalokho sahluleka ukunqoba imidlalo ewu-11 eyalandela, ngakho siyakwazi okufanele sikwenze. Sizosebenzisa leli khefu lenyanga ukuhlanganisa isikwati sethu kahle ngoba ngemuva kweChiefs siyoze sidlale ngoSepthemba 15, ngakho sizoba nesikhathi esanele ukulungisa izinkinga,” kuqhuba uDavids.
UYannick Zakri ugcine efikile kwiTeam of Choice ngemuva komdonsiswano wesikhashana kuthiwa ubengafuni ukubolekiswa. UDavids uthe ukufika kukaZakri kuzolisiza kakhulu iqembu lakhe, njengoba ebolekiswe iMamelodi Sundowns isizini yonke ka-2018/2019. “Kuzosisiza kakhulu ukufika kukaZakri, ngoba kule midlalo emithathu esisayidlalile kucacela ngisho ingane encane ukuthi kukhona lapho kushoda khona uma singena engxenyeni enkulu yezitha. Empeleni selokhu kwahamba u-Evans Rusike kunesikhala esikhulu esingavalekile, ngakho nginethemba lokuthi uzofika asivale leso sikhala esilokhu sikhala ngaso,” kuphetha uDavids.