Ufuna ubumbano kwabesifazane
UMKHULUMELI omusha we-ANC KwaZuluNatal, uNkk Nomagugu Simelane-Zulu, unxusa abantu besifazane ukuthi babumbane ukuze kufezeke iphupho lokuthi iNingizimu Afrika ibe nomengameli wesifazane.
Engxoxweni neSolezwe ngemuva kokuqokelwa kulo msebenzi, uNkk Simelane Zulu (41) owazalelwa waphinde wakhulela eZola, eSoweto kodwa manje osenomndeni eKZN njengoba eshadele esifundeni e-Abaqulusini, uthe abantu besifazane yibona abaningi kwiANC nasemphakathini-jikelele kodwa abalisebenzisi lelo thuba.
“Ngesikhathi siya engqungqutheleni ye-ANC eNasrec siyi-ANCWL sasifisa sengathi uDkt Nkosazana Dlamini Zuma angaphumelela, sadumala uma enganqobi kodwa siyamamukela umengameli okhona, uMnuz Cyril Ramaphosa,” kusho uNkk Simelane-Zulu.
Uthe uDkt Dlamini Zuma njengeqabane elinamava, akazange adikibale njengoba namanje esekhona esebenza njengongqongqoshe ehhovisi likamengameli.
UNkk Simelane-Zulu ongumama wezingane ezimbili, ungumkhulumeli wesibili wesifazane we-ANC eKZN ngemuva kukaDkt Makhosi Khoza, owalaxaza inhlangano wasungula iqembu.
“Uhulumeni oholwa yi-ANC wenza konke okusemandleni ukuthi anikeze abesifazane amathuba alinganayo nabesilisa njengoba phambilini bebecindezelekile kodwa siyazi-ke ukuthi emkhakheni wezepolitiki kusakhala isicathulo sabesilisa, okwenza ube mkhulu umsebenzi okusamele wenziwe ukuze kuvalwe igebe.”
UNkk Simelane-Zulu oneziqu ezimbili zaseNyuvesi yaKwaZuluNatal, iBachelor of Arts neBachelor of Law kanti akasiye umafikizolo kwezombusazwe njengoba eqale ukuzimbandakanya nepolitiki esaneminyaka engu-15. “Njengoba ngike ngasho ukuthi ngizalelwe eZola ngakhululela khona naseDobsonville, kuthe sengineminyaka engu-15, ngangena kwisigungu esilawula igatsha se-ANCYL okuthe ngonyaka olandelayo ngabe sengikhethwa ngaba uMgcinimafa we-ANCYL egatsheni,” kusho uNkk Simelane-Zulu. Uthe ngesikhathi efunda e-UKZN, bakha igatsha le-ANCYL nalapho akhethwa khona waba nguSihlalo walo kusukela ngo-1999, kuya ku-2003.
“Ngawo futhi u-1999, kuya ku-2002, bengiyilungu leSRC khona e-UKZN,” kusho uNkk Simelane-Zulu.
Uthe khona futhi e-UKZN njengoba kade enza izifundo zomthetho, ubambe iqhaza kwiBlack Lawyers Association Students Chapter nakwiLaw Society yezitshudeni.
“Ngiphume enyuvesi ngasebenza kancane njengommeli ngaphambi kokuthi ngijoyine uhulumeni,” kusho uNkk Simelane-Zulu.
Uthe ngo-2003 kuya ku-2010, ukhethwe njengoMgcinimafa we-ANCYL KwaZulu-Natal.
“NgisawuMgcinimafa we-ANCYL esifundazweni ngaphinde ngakhethwa ebuholini be-ANC eBaqulusini lapho ngibe uSihlalo,” kusho Nkk SimelaneZulu.
Ngo-2015, ube esekhethwa njengelungu lesigungu esihola i-ANC esifundazweni, okuwuhlaka olwahlakazwa ngemuva kokuphonselwa inselelo enkantolo komphumela wengqungquthela ka-2015.
“Ngo-2017, ngakhethwa njengePhini likaSihlalo we-ANCWL eKZN, nokulapho umbutho wabesifazane wathatha isinqumo sokuthi ngiphinde ngibe umkhulumeli wawo esifundazweni,” kusho uNkk SimelaneZulu. Uthe ngaphambi kokuthi abe ngumkhulumeli we-ANCWL eKZN uke wabamba iqhaza emkhakheni wezokuXhumana kwi-ANC ngesikhathi isakhulunyelwa uMnuz Senzo Mkhize ongasekho.
“Ngicabanga ukuthi amava engiwathole kade ngisebenza noMkhize nangesikhathi ngikhulumela i-ANCWL azongisiza kakhulu kulo msebenzi wami omusha,” kusho uNkk SimelaneZulu.
Ebuzwa ukuthi akaziboni yini engaphansi kwengcindezi enkulu njengoba engena esikhundleni ebesibanjwe ngobunyoninco uMnuz Mdumiseni Ntuli obekhulumela inhlangano ngaphambi kwakhe manje osenguNobhala, uthe uNtuli ubewenza ngendlela yakhe umsebenzi, wengeza ngokuthi naye ucela ukunikwa ithuba enze ngendlela yakhe.
Uthe uphiko lwezokuxhumana lwe-ANC lusebenza kahle, wathi into abayijahile ukuqinisa ubudlelwano babo nabezindaba.
“Sifuna ukusebenzisana kahle nabezindaba, asifuni ukuthi abezindaba babukeke njengabantu abayizitha zenhlangano, uma singasebenzisana kahle singaba nomphakathi othuthukayo,” kusho uNkk Simelane-Zulu.
Uthe njengoba engumuntu wesifazane ongusopolitiki, uphinde abe ngumama uma esesekhaya.
“Kunzima ukuba usopolitiki uphinde ube ngumama, akufani nomuntu wesilisa ongusopolitiki ngoba uma kugula ingane kuthintwa wena muntu wesifazane, hhayi indoda,” kusho uNkk Simelane-Zulu.
Uthe uma esekhaya uyawabamba amabhodwe futhi umndeni wakhe uyasithanda isandla sakhe. Ululeke abesifazane abasebancane abakwezombusazwe ngokuthi bangazami ukuzenza amadoda.
“Okunye okumele bakuqaphele ukuthi amadoda ahlale enendlela yokuzama ukusebenzisa abesifazane ukulwa izimpi zawo.”