Ukuncelisa kusindisa nonina wengane
UKUNCELISA ingane ibele akulungele ingane kuphela kodwa kusiza nonina osuke encelisa.
Ucwaningo selukhombise ezikhathini eziningi ukuthi ukuncelisa ingane ubisi lwebele kwenza umehluko ekwehliseni izibalo zezingane ezishona zisanda kuzalwa futhi kwenza izingane zikhule kahle. Phezu kwalokhu kunomthelela ekuvikeleni isifo sikashukela nokhwantalala komama.
UDkt Howard Manyonga ongungoti kwezokubelethisa futhi oyinhloko yohlelo olugxile ekufundiseni ngokunakekelwa kwezingane ezisanda kuzalwa nomama abasanda kubeletha, olwaziwa ngeThe Birthing Team, uthe ukuncelisa ibele kubalulekile ezinganeni futhi kuvikela izifo.
“Ubisi lwebele luwukudla okunempilo okubalulekile ezinganeni ezisanda kuzalwa futhi luyasiza ekuvikeleni izifo nokufa kwezingane. Komama (ukuncelisa ubisi lwebele) kusiza ekutheni basheshe balulame emuva kokubeletha futhi kubenza basondelane kakhulu nezingane zabo,” kusho uDkt Manyonga.
Inhlangano iWorld Health Organisation (WHO) igqugquzela omama ukuthi basheshe bazincelile izingane emuva kokubeletha, lingapheli ihora bengakwenzanga.
Yize iWHO igqugquzela omama ukuthi basheshe bancelise izingane ubisi lwebele ngaphambi kokuthi kuhlangane ihora zizaliwe, kusanda kuvela ukuthi iningi lezingane alisheshi linceliswe.
Ngokusho kombiko osanda kukhishwa yiWHO ne-Unicef, zilinganiselwa ku-78 million izingane ezinganceliswa kulesi sikhathi esigqugquzelwa yiWHO okuzenza zibe sengozini yokuthola izifo kalula, okungenza zingaqhubeki nokuluncela ubisi lwebele uma seziqalile.
Iningi lalezi zingane kuthiwa livela emazweni ahlwempu.
Umbiko uveza ukuthi izingane ezisheshe zinceliswe ibele lingakapheli ihora zizelwe zisethubeni elihle lokuthi ziphile.
Omama badinga ukwesekwa yimindeni yabo nabasebenzi bezempilo, ukuze bakwazi ukuncelisa izingane zabo.
Umqondisi jikelele we-Unicef, uNksz Henrietta Fore uthe sibalulekile isikhathi okuqaliswa ngaso ingane ukuncela ubisi lwebele.
“Isikhathi okunceliswa ngaso ingane ibele emuva kokuthi izaliwe sibaluleke kakhulu futhi singaba nomthelela ekutheni ingane iyaphila noma iyashona yini.
Kodwa kuyakhathaza ukuthi izinkulungwane zezingane azilitholi ithuba lokuthi zisheshe zinceliswe. Ezinye zezizathu zokunganceliswa kwezingane yizinto esingazishintsha. Omama abakutholi ukwesekwa okufanele esikhathini esibalulekile emuva kokubeletha, abakutholi ukwesekwa nakubasebenzi bezempilo ezikhungweni zempilo (uma beqeda kubeletha),” kusho uNksz Fore.