Imigomo yokunakekela ezinomdlavuza
INHLANGANO elwela amalungelo abantu abaphila nomdlavuza, iCancer Alliance seyikhiphe imigomo engalandelwa ukunakekela izingane ezinomdlavuza.
Le migomo ibhekele ukunakekela izingane esezifinyelele esimeni sokuba nomdlavuza ongeke usalapheka. Igxile ekunakekeleni izingane ukuze kuqinisekiswe ukuthi impilo yazo iba sesimeni esifanele noma sezigula kakhulu.
Inhlangano yezempilo emhlabeni wonke iWorld Health Organisation (WHO) ichaza ukunakekelwa kwezingane ezinezifo ezingalapheki (palliative care) njengokunakekelwa komzimba wengane nomphefumulo wayo. Iphinde iveze ukuthi ukunakekela ingane akugcini ngayo kuphela kodwa kusho ukunakekela nomndeni wayo nokuweseka.
Lokhu kuqala ngesikhathi kutholakala ukuthi ingane inesifo esifana nomdlavuza nezinye nesigaba ekusona. Lolu hlobo lokunakekela umntwana luyaqhubeka ngisho ingane ingayitholi imishanguzo yaleso sifo. I-WHO ikubeka kucace ukuthi abasebenzi bezempilo kufanele baqinisekise ukuthi bayasibhekisisa isimo sengane sezempilo, esengqondo nesezenhlakalakahle ukuze ikwazi ukusizakala.
Nemigomo yeCancer Alliance igqamisa ukubaluleka kokwesekwa kwabazali nemindeni yezingane ezinomdlavuza ngisho kungathiwa baqhamuka kumiphi imiphakathi.
Bathi kufanele kube nezikhungo ezinakekela izingane esezigula kakhulu. Imigomo ithi kufanele kuphele imishanguzo egcina seyiholela ekutheni izingane zingakhahlamezeki ngokungenasidingo.
Ngokusho kwabalobi bemigomo, ukunakekelwa kwabantu abasuke bephethwe yizifo ezingalapheki (palliative care) akusho ukukunakekela abantu abasuke sebengashona noma kunini kodwa kusho ukunakekela abantu ngendlela enesizotha nothando.
Le ndlela yokunakekelwa kweziguli ibaluleke kakhulu ezinganeni njengoba zona zisuke zisazokhula zibe ngabantu abadala zinesifo esingalapheki kuphinde kubeke ingcindezi kubazali bazo nokuyibona abasuke bezinakekela.
USihlalo weCancer Alliance, uNkk Linda Greeff, ukhale ngokuthi kusenzima ukuthi izingane zithole usizo lwezempilo olufanele uma zinezifo ezingalapheki.