Siya simnciphela isikhathi u-Erasmus
ASESALELWE yimidlalo yamaTest ewu-15 kuphela amaBhokobhoko ngaphambi kokuthi kuqale iNdebe yoMhlaba ezobe iseJapan ngonyaka ozayo.
Lokhu kusho ukuthi isikhathi sokwenza amalungiselelo kumqeqeshi wamaBhokobhoko uRassie Erasmus siya ngokuya sincipha. NgoMgqibelo ezikaErasmus zizotholana phezulu ne-Argentina, eKings Park Stadium, eThekwini, emdlalweni weRugby Championship.
Lo mdlalo obhekwe ngabomvu uzoqala ngo-5 ntambama. Ekhuluma izolo u-Erasmus eseGarden Court eMhlanga, utshele izintatheli ukuthi kungenzeka azame ukudlalisa abadlali abehlukene ezindaweni ezahlukene ngenhloso yokuthola ukuthi ezakhe ngabe zibuthaka kuphi futhi ziqine kuphi. Uthe lokhu kuyingxenye yamalungiselelo eNdebe yoMhlaba.
Uqhube wathi kungenzeka abadlali beCell C Sharks abayibamba enkabeni okunguAndre Esterhuizen noLukhanyo Am kube yibona abaqala phakathi nendawo ngoMgqibelo.
Ngaphandle nje kokuthi laba bobabili bazobe bedlala enkundleni abayijwayele kodwa uthe esinye isizathu ukuthi bashaye into ecokeme kwiVodacom Super Rugby ngesikhathi iSharks iphuma kumaquarter-final.
“Kuningi esifuna ukukuzama ngoba neNdebe yoMhlaba isisondele. Yingakho ngoMgqibelo sizozama ukudlalisa abadlali abaningi sibahlole ukuthi ngabe baqine kuphi futhi babuthaka kuphi. Akungoba seya i-Argentina ngokwenza le mizamo kodwa kungenxa yokuthi siyayihlonipha siyayazi ukuthi iyamangazana. Kungenzeka siqale enkabeni ngabadlali beSharks u-Andre noLukhanyo ngoba bayazana, sifuna ukubona ukuthi uma benengcindezi bazokwenza njani,” kusho u-Erasmus izolo.
Imidlalo yeRugby Championship yamaBhokobhoko imi kanjena:
Agasti 18: Azobhekana ne-Argentina eThekwini
Agasti 25: Azobhekana ne-Argentina eMendoza
Septhemba 8: Azodlala ne-Australia eBrisbane
Septhemba 25: Azodlala neNew Zealand eWellington
Septhemba 29: Azobhekana ne-Australia ePort Elizabeth
Okthoba 8: Azodlala neNew Zealand ePitoli.