I-Safa ithathe isinqumo esilula ngoweBafana

I-SOUTH African Football Association (SAFA) ithi kube yisinqumo esilula ukuletha umdlalo weBafana Bafana neLibya eThekwini ngenxa yabalandeli bebhola baKwaZulu-Natal abangakaze baphoxe uma kuzodlala elesizwe eThekwini.

IBafana izotholana phezulu neLibya ngoSepthemba 8, eMoses Mabhida Stadium yodumo. Lona kuzobe kungumdlalo wokuhlungela i-Africa Cup of Nations (Afcon) ezodlalelwa eCameroon ngonyaka ozayo.

Ngemuva kwalokho, iBafana izodlala imidlalo emibili elandelanayo neSychelles ngo-Okthoba 13 nango-Okthoba 16. Nayo kuzobe kungeyokuhlungela i-AFCON.

UDominic Chimhavi okhulumela iSafa utshele Isolezwe ukuthi uma ufuna ubumnandi woza Durban.

“Asinanazanga ukusa umdlalo eThekwini ngoba asikaze nakanye siphoxeke uma sise khona umdlalo weBafana ngenxa yokwesekwa esikutholayo kubantu baseKZN. Ngenxa yokubaluleka komdlalo wethu neLibya sibone kungcono siwuse lapho sinesiqiniseko sokuthi sizothola ukwesekwa. Uma singashaya iLibya, bese sishaya kabili iSeychelles lokho kobe kusho ukuthi sesingenile kwi-AFCON,” kusho uChimhavi.

Eqhubeka echaza, uChimhavi uthe amathikithiki azoqala ukudayisa kungekudala.

“Sizomemezela kungekudala ukuthi amathikithi azotholakala kuphi futhi kanjani. Sinethemba lokuthi lizothi lingakapheli isonto sibe sesimemezelile ukuthi azotholakala kuphi futhi ngamalini,” kuchaza uChimhavi.

IBafana inengcindezi enkulu yokuhlungela ngempumelelo i-Afcon njengoba ihluleke yancama ukuzibekisela indawo kwiNdebe yoMhlaba ebiseRussia ngaphansi kukaStuart Baxter. Lo mqeqeshi kuke kwavela ukuthi ubefunwa yiKaizer Chiefs ukuthi azovala isikhala sikaSteve Komphela. AmaKhosi agcine eqashe uGiovanni Solinas waseItaly owafika eNingizimu Afrika ezoqeqesha iFree State Stars.