‘Asazi bakhethwa kanjani abeShisanyama’
BACASUKILE abanikazi boshisanyama baseThekwini abathi kabazi ukuthi bakhethwa kanjani abagcina benqobe umncintiswanoi iShisanyama Awards.
Bathi kabazi ukuthi yimiphi imigudu elandelwayo uma kukhethwa oshisanyama abahamba phambili kodwa bavele babone sekuthi thushu uhla lwalabo asebengene kowamanqamu. Kuzoba kungokwesithathu imiklomelo ikhona kulo nyaka.
Izolo kukhishwe oshisanyama abahlanu okuzokhethwa kubo ohamba phambili eThekwini. Labo yi-Unique Lifestyle Cafe yaseMhlanga, Seaman’s Corner Restaurant yaseHammarsdale, The Joint Beach & Jazz Cafe eSouth Beach, Sbu’s Lounge eNanda neCafe Skyzer eChesterville.
Bobahlanu bazomenywa ukuthi bayokosa kwiShisanyama Festival ezoba seYadini Lounge, eMlaza, ngoSepthemba 1-2 bese kumenyezelwa ohamba phambili.
Umnikazi weMetro Gents eMlaza, uLunga Mkhize, uthe useze waphelelwa nawuthando ngenxa yokuthi akazi ukuthi bakhethwa kanjani abanqobayo.
“Ngisebumnyameni nje. Angisasiboni nesidingo sawo ngoba angazi ukuthi kukhethwa kanjani. Angazi lutho nje ngale miklomelo,” kusho uLunga.
UBonga Shange ophethe eMashamplanez Lounge, eChesterville, uthe kungaba kuhle ukuthi bachazelwe ukuthi kungenelwa kanjani.
Uqhube wathi okunye okumkhalisayo wukuthi umcimbi unabaxhasi kodwa onqobile ugcina ngokuthola isitifiketi kuphela.
Umnikazi wase-031 Shisanyama eBerea, uNkule Sithole, uthe udukuza ebumnyameni ngemiklomelo.
UMagoo Dlamini waseMoyito Lounge, ePinetown, uthe: “Angifuni ukuqamba amanga, angazi lutho.”
UMjey Zama, umnikazi weYadini Lounge, uthe wazi ngefestiveli kuphela, hhayi imiklomelo.
“Angizazi izinhlelo zawo zihamba kanjani.”
Umsunguli wemiklomelo uMichelle Lewis, uthe ekuqaleni konyaka bahlanganisa uhla loshisanyama baseThekwini. Kulo nyaka bangaphezulu kuka-20.
“Amajaji abe esehambela izindawo zamakhasimende eyohlola ukuthi zenza ezikuthembisayo yini. Abe esehlangana ekhipha ezinhlanu eziphambili. Njengoba kunguAgasti bazohambela lezi ezinhlanu bakhethe ephambili ezomenyezelwa kwifestivali.”
Uthe ukuthi bakhetha kanjani kukhona kwi-website yabo. Kuvela ukuthi babheka izinga lenyama nokuthi bayiletha kanjani ngemuva kokosiwa, okudliwa nenyama, indlela okuphathwa ngayo amakhasimende nokunye.