Abancane bangashada uma bevunyelwa
NGOKOMTHETHO wakuleli izingane ezineminyaka ewu-16 zinelungelo lokushada ngokusemthethweni uma abazali noMnyango wezaseKhaya ubanikeza imvume.
Umthetho uyakuvuma yize kunemibandela eminingi okumele ilandelwe, ngokusho kukaMnuz Mfanafuthi Biyela wenkampani yabameli iBiyela Attorneys.
“Uma uneminyaka engaphansi kwewu21 ufuna ukushada kumele uthole imvume yabazali. Uma uneminyaka engaphansi kwewu-18 kusuke kumele uthole imvume yabazali bobabili neyoMnyango wezaseKhaya. Ngaphandle kwalokho umshado awubi semthethweni,” kusho uBiyela.
Uthe kumele kuqikelelwe ukuthi abasuke beshada kumele babe nomazisi ngokwemithetho yoMnyango wezaseKhaya.
“Umazisi ubaluleke kakhulu ngoba yiwona okumele bashintshe ngawo izibongo, babhalise nomshado ngokusemthethweni.”
Uthe okunye okumele bakuqonde abancane abafuna ukushada wukuthi inhlobo enjani yomshado abayifunayo.
“Umshado yisigaba esibalulekile empilweni yomuntu, ikakhulukazi kumuntu osemncane ngoba usuke esezosuka ekubeni yingane abe yinkosikazi nendoda yomuzi. Kuningi okumele akucabange ngokomthetho.”
UNkk Joan Van Niekerk oyisishoshovu samalungelo ezingane nokuvikelwa kwezingane uthe yize kuvumelekile ukushada kwabantu abancane uma benemvume kodwa ngokwakhe kungakuhle bangakhuthazwa ukuba baqhubeke nokushada.
“Kubalulekile ukuthi abantu abasebancane bagqugquzelwe ukuthi bangasheshi ukwenza isinqumo sokungena emshadweni. Kungcono balinde kuze kube baqeda isikole kuqala, bakhule ngokwanele nangomqondo. Umshado unezinselelo eziningi. Nemali iyadingeka emshadweni. Lokho kungaba yinkinga enkulu kumuntu oneminyaka ewu-16,” kusho uNkk Van Niekerk.
Uthe ngokwakhe esikhathini esiningi abantu abancane basuke benesizathu esenza besheshe bashade njengokuthi bafuna ukuya ocansini, baqale umndeni. Abanye basuke bebalekela ukulahlwa yimithetho yebandla noma yesiko nokunye.
Uthe okunye okwenza imishado yabantu abancane ibe yinkinga wukukhulelwa kowesifazane esesikoleni ngoba uyaphazamiseka. Nowesilisa kungenzeka azwe isidingo sokuba ondle umndeni wakhe bese eyeka isikole efuna ukuyosebenza.