Banqunyelwe okatiki abadube ukufunda
BANQUNYELWE ugwayi katiki abafundi baka-matric besinye sezikole zaseNquthu abadube ukufunda amasonto amabili bayohlala emakhaya ngoba bethi ababezwa othisha besikole abathuthelwe kuso.
Abafundi baseFunulwazi Secondary, KwaHlazakazi kuthiwa bathathwe phakathi kwalo nyaka esikoleni sabo bayiswa eMangeni High ukuze bayofunda khona.
Lokhu kuthiwa kwenzeke ngemuva kokuba besale dengwane bengenathisha ngoba beshiyile abebebafundisa.
Umnyango nawo kuthiwa ukhiphe umyalelo wokuba laba bafundi ababhekelwe kwezinye izikole ngoba ngeke ukwazi ukuvala izikhala zalabo thisha abahambile.
USihlalo wesigungu esilawula isikole eFunulwazi, uNkk Piyoyo KaMabaso Ndimande, uthe kugcine sekungenelela umhloli ngoba izingane zingayingeni eyokuyofunda eMangeni.
“Lezi zingane okuhlanganisa neyami besezifunda eMangeni. Kuthe kusenjalo zayeka ngoba zikhala ngokuthi azibezwa othisha baseMangeni futhi zibukelwa phansi. Ezinye zivele zaduba zahlala emakhaya kwathi ezinye zabuya zazohlala esikoleni sazo esidala yize othisha singenabo.”
Uqhube wathi kusize ukungenelela komhloli ofike wathi labo abafuna ukuqhubeka nokufunda ababuyele esikoleni.
Uthe ezinye izingane okuhlanganisa neyakhe zibuyele eMangeni okuyisikole ezazithuthelwe kuso nesiqhele ngamakhilokitha abalelwa ku-20.
Uveze ukuthi lezi ezinye ziqoke ukubuyela eFunulwazi okuyisikole sazo esingenabo othisha. Uthe usola ukuthi lezi ezisele zifundiswa uthishanhloko. Omunye wabazali uNksz Thobile Sithole uthe ingane yakhe uyitshele kahle ukuthi uma idlala ngaleli thuba iyozisola kungasekho ukubuyela emuva.
“Lezi zingane ziyaganga zithi azibezwa othisha baseMangeni futhi zibukelwa phansi, zinikezwa izincwadi ezindala zokufunda ezingafani nezika-matric eziwufice eMangeni. Mina ngiyitshele kahle lena yami ukuthi akukho muntu ozohlala ekhaya njengoba besebeqede inyanga. Ngiyithethisile impela ngoba sesize sathenga nomfaniswano wakhona eMangeni manje bona sebebona ukuthi abayeke ukufunda. Okokuqala uma bebuyela eFunulwazi bazofundiswa ubani ngoba othisha abekho?” kubuza uNksz Sithole.
Okhulumela uMnyango wezeMfundo KwaZulu-Natal, uMnuz Kwazi Mthethwa uthe sibethuse kakhulu lesi senzo sabafundi.
Uthe uNgqongqoshe uMthandeni Dlungwane ngeke akwazi ukubekezelela abafundi abahluphayo kulesi sikhathi sonyaka.
Uveze ukuthi kumanje kusele izinsuku ezibalelwa ku-50 ngaphambi kokubhala kuka-matric ngakho bafuna lolu daba lulungiseke ngokukhulu ukushesha. Uthe uNgqongqoshe uzolulandelela axhumane noMqondisi wesiFunda uMzinyathi.