Abebezenza abagibeli ‘babulale’ umshayeli wetekisi
BAGCWELE amathafa abalisa ababili abasolwa ngokudubula babulale usomatekisi eCanelands, eVerulam, bezenza abagibeli.
Kusolakala ukuthi lo mshayeli wetekisi udutshulwe kabili ekhanda abalisa ababili abebesetekisini iToyota Quantum abeyishayela ngesikhathi beseduze kweShoprite Distribution Centre, eCanelands. Lesi sigameko senzeke emgwaqweni uNew Glascow, eCanelands.
UMnuz Prem Balram, okhulumela abezimo eziphuthumayo iReaction Unit South Africa uthe babizelwe endaweni yesigameko emuva kwehora lesishiyagalolunye izolo ekuseni.
“Sithintwe ngumlimi obedlula le tekisi emhlophe iToyota Quantum ngesikhathi ezwa kuqhuma isibhamu. Ngesikhathi itekisi ima kuthiwa kubonakale abalisa ababili bebaleka ngezinyawo beya ngasemfuleni. Ngokusho kwabagibeli laba balisa bobabili bebephethe izibhamu,” kusho uBarlam.
Kuthiwa abanye abagibeli basaphazeke endaweni yesigameko, bebaleka ngoba besabela impilo yabo. Kube sekutholakala inhlamvu eyodwa ngaphakathi emotweni.
Okhulumela amaphoyisa KwaZulu-Natal, uCaptain Nqobile Gwala ukuqinisekisile ukuthi amaphoyisa aphenya icala lokubulala emuva kokubulawa komshayeli wetekisi.
Uthe kusolakala ukuthi lo mshayeli ubulawe abalisa ababili abebezenza abagibeli.
UCaptain Gwala uthe laba balisa abangaziwa kukholakala ukuthi bamise itekisi bezenza abagibeli, bagibela base bamdubula ngaphandle kokukhuluma lutho kuyena.
“Umshayeli ulimale ekhanda, kwaqinisekiswa ukuthi ushonile endaweni yesigameko. Isizathu sokubulawa kwakhe asikaziwa. Amaphoyisa avule icala lokubulala kanti bekungakaboshwa muntu,” kusho uCaptain Gwala.