URamaite uzobamba kwesika-Abrahams
UMENGAMELI Cyril Ramaphosa uqoke uDkt Silas Ramaite ukuthi abambe esikhundleni sokuba nguMqondisi wezokuShushiswa koMphakathi emuva kokuthi iNkantolo yoMthethosisekelo inqume ukuthi ukuqokwa kukaAdvocate Shaun Abrahams kwakungekho emthethweni.
UNkk Khusela Diko okhulumela ihhovisi likaRamaphosa uthe uMengameli uqoke uRamaite ukuthi abambe ngesikhathi esafunda ngokugcwele isinqumo senkantolo ebheka nomuntu ozongena esikhaleni sikaAbrahams.
“UMengameli uzocubungula isinqumo senkantolo futhi uzolandela umgomo wokuthi aqoke uMqondisi wezokuShushiswa koMphakathi kungakapheli izinsuku eziwu-90. Okwamanje uDkt Ramaite nguye ozobheka ezokushushiswa komphakathi,” kusho uNkk Diko esitatimendeni.
Uthe uRamaite uyiPhini loMqondisi wezokuShushiswa koMphakathi, okuwumsebenzi asehlale kuwo iminyaka ewu-15.
Ubegxile ophikweni lokuvikelwa kofakazi bombuso.
URamaite uneziqu zeB.Proc azithola eNyuvesi yaseFort Hare, ezeLL.B; ezeLL.M, ezigxile kwiCriminal Law, Constitutional Law, Administrative Law nePublic International Law.
Uphinde abe neziqu zeLL.D, ezigxile kwiConstitutional Law azithola eNyuvesi yaseSouth Africa.
Uqokwe ukuba abe ngummeli wasemaJajini (Supreme Court) ngo-1988 wathola isitifiketi sokuba ngummeli omkhulu (Senior Counsel (SC) ngo-2001.
URamaphosa ufisele uRamaite okuhle emsebenzini azowenza okwesikhashana wathi uyamthemba ukuthi uzophatha kahle abuyise nokuthenjwa kophiko lwezokushushisa.
Khonamanjalo, uNgqongqoshe wezoBulungiswa nezokuHlunyeleliswa kwezimilo, uMnuz Michael Masutha, uthe akazange abambe iqhaza ezingxoxweni zokukhokhela owayenguMqondisi wezokuShushiswa koMphakathi u-Adv Mxolisi Nxasana uR17 million.
Igama likaMasutha belifakwa kwawabantu abasiza uNxasana ukuba athole uR17 million.