Bathole ibheyili kwelokudla umhlaba
ABANTU abayisishiyagalombili abebeboshelwe ukudla umhlaba eBurlington, eduze kwaseQueensburgh, eThekwini, bathole ibheyili emuva kokuvela eNkantolo yeMantshi ePinetown izolo.
Owesishiyalalolunye kubo udedelwe ngesexwayiso.
Bebekade beboshwe ngoMsombuluko ngenxa yokuthi baqhubekile nokudla umhlaba yize kufe umuntu oyedwa ngoMgqibelo okusolakala ukuthi udutshulwe ngonogada bakaMasipala weTheku.
NgoMgqibelo kushone uMnuz Siyanda Ndlovu (18) okusolakala ukuthi udutshulwe wonogada bakwamasipala.
Udadewabo kaNdlovu, uNksz Ntombenhle Ndlovu, uthe ushone esendleleni eya esibhedlela emuva kokudutshulwa entanyeni nasesiswini.
UColonel Thembeka Mbele wamaphoyisa KwaZulu-Natal uthe ababoshiwe bathole ibheyili izolo.
“Amaphoyisa asiqaphe ngeso lokhozi isimo eBurlington, Malvern naseShallcross ukuqinisekisa ukuthi abekho abaphula umthetho,” kusho uMbhele.
Ikhansela lendawo, uNksz Samantha Windvogel, uthe ubhalele iNhloko yezokuPhepha kuMasipala weTheku, uMnuz Blake Richards, ukuze badingide okuholele ekubulaweni kukaNdlovu futhi kube nophenyo.
“Kuyishwa ukuthi ngesikhathi abantu baseNingizimu Afrika bekhala ngesigameko sokubulawa kwabantu ngesihluku eMarikana sekubulawa omunye eBurlington. Asiyifuni le nto yokuthi onogada badubule ngezinhlamvu zangempela kubantu abasuke bengahlomile. Abantu baseBurlington kudala bephila esimeni esingesihle belindele ukwakhelwa izindlu zomxhaso kodwa uhulumeni we-ANC engabanakile,” kusho uNksz Windvogel.
Uthe yize bekugxeka ukudliwa komhlaba kodwa uhulumeni we-ANC kufanele afeze isithembiso sokwakhela abantu imixhaso njengokubathembisa kwakhe.
“Sizobonana nomndeni wakwaNdlovu siyokhalisana nawo ngokulahlekelwa yindodana yawo,” kusho uNksz Windvogel.