Zibuya namajoka enyuvesi yaseKZN
KUZOQALWA ngoLwesihlanu ukufunda nokufundisa enyuvesi yaKwaZuluNatal ophikweni lwaseWestville. Lokhu kulandela umbhikisho wezitshudeni njengoba bekulindeleke ukuthi luvulwe lolu phiko ngemuva kombhikisho wangoMsombuluko zikhala ngezimo ezihlala ngaphansi kwazo, ukungafiki ngesikhathi koxhaso lweNational Students’ Financial Aid Scheme.
Okhulumela isikhungo, uNksz Normah Zondo, uthe uphiko lwezokuphepha kule nyuvesi namaphoyisa luhlakaze izitshudeni ebezibhikisha izolo ekuseni.
Uthe ukumiswa kwezifundo kuzonika abaphathi ithuba lokuthi baxoxe nezitshudeni.
“Abaphathi baziphendulile izikhalo zezitshudeni okubalwa izindawo zokuhlala, ukuhamba kancane kwe-WiFi, uhlelo lokuhamba kwamabhasi athwala izitshudeni nokuchithwa kwezinye izitshudeni,” kusho uNksz Zondo.
Uthe kumile ukufunda kuzoze kuqale ngoLwesihlanu.
Ezinye zezitshudeni zikhala ngokuthi kufana nokuthi zihlala emjondolo njengoba zingenawo namanzi ashisayo.
Esinye isitshudeni esicele ukungavezwa sithe azinakwa izikhalo zazo njengoba zihlala ziletha uhide lwazo.
“Zibalelwa ku-300 izitshudeni ezihlala e-O Block kodwa zincane izindlu zokugeza ezisebenzayo. Izindlu ziyavuza uma lina, amanzi avuza kusuka esitezi esiphezulu kuya kwesiphansi,” kusho isitshudeni.
Sithe uma kuyisehlobo abakwazi ukubeka umbhede noma yikuphi ngoba kungena imvula kwezinye izindawo.
“Kunezimbobo amagundane ayangena azenzele ekudleni kwethu. Izindawo zokufundela azinawo amatafula nezihlalo futhi ayikho nendawo yokubuka ithelevishini,” kusho isitshudeni.